დუნია მიატოვიჩის განცხადებით, საქართველოს მმართველი პარტიის მხრიდან კონსტიტუციის შესწორების ინიციატივა "ლგბტი-ფობიით წინასაარჩევნო მანიპულირებაა". ევროსაბჭოს კომისრის სიტყვებით, მსგავს ინიციატივას ადგილი არ უნდა ჰქონდეს კანონის უზენაესობასა და ადამიანის უფლებების პატივისცემაზე დაფუძნებულ დემოკრატიულ საზოგადოებაში. "მოვუწოდებ საქართველოს ხელისუფლებას, როგორც ევროპის საბჭოს წევრმა სახელმწიფომ, სრულად პატივი სცეს ადამიანის უფლებების დაცვის ვალდებულებებს, მათ შორის ლგბტი ადამიანების უფლებების დაცვასა და სამოქალაქო საზოგადოების საქმიანობისა და ადამიანის უფლებებისთვის ხელსაყრელი გარემოს უზრუნველყოფას. მოვუწოდებ საქართველოს ყველა პოლიტიკოსს, მტკიცედ დაგმოს ლგბტი-ფობიის ან სხვა დისკრიმინაციული რიტორიკის გამოყენება საარჩევნო კამპანიაში". დუნია მიატოვიჩის შეფასებით, "ქართული ოცნების" ინიციატივა ასახავს ლგბტი ადამიანების მიმართ გამყარებულ იმ მავნე სტერეოტიპებსა და ცრურწმენებს, რომლებიც ჯერ კიდევ ჭარბობს ქართული საზოგადოების ნაწილში, მათ შორის, ზოგიერთ პოლიტიკოსში: "ამ ინიციატივას შეუძლია ძლიერი, უარყოფითი ზეგავლენა მოახდინოს ლგბტი ადამიანების უფლებებზე, მათ უსაფრთხოებასა და კეთილდღეობაზე". კომისრის თქმით, ლგბტი ადამიანები კვლავ არიან სიძულვილის, დანაშაულებისა და გავრცელებული დისკრიმინაციის სამიზნე საქართველოში: "მე არაერთხელ მოვუწოდე საქართველოს ხელისუფლებას, რომ გაეტარებინა ნულოვანი ტოლერანტობის პოლიტიკა ლგბტ ადამიანების დისკრიმინაციის ყველა ფორმისა და დისკრიმინაციისა და ძალადობის წაქეზების მიმართ. ბოლო თვეებია მე თვალს ვადევნებ მზარდ მასტიგმატიზირებელ რიტორიკას, რომელსაც ზოგიერთი პოლიტიკოსი იყენებს საქართველოში უფლებადამცველებისა და სამოქალაქო საზოგადოების მუშაობის ძირის გამოთხრის მიზნით". 25 მარტს საპარლამენტო უმრავლესობის ლიდერმა ისაუბრა საკონსტიტუციო ცვლილებების პროექტზე, რომლის მიღების შემთხვევაშიც პროპაგანდის აკრძალვის საფუძვლით შეიზღუდება ლგბტ პირთა უფლებები. არასრულწლოვანის შვილად აყვანა შეეძლება ქორწინებაში მყოფ ოჯახს (ქალსა და კაცს) ან ჰეტეროსექსუალ ადამიანს; აიკრძალება სქესის შეცვლასთან დაკავშირებით ნებისმიერი სამედიცინო ჩარევა; აიკრძალება იმგვარი შეკრებები და პროგრამების ან მასალების გავრცელება, რომლებიც ერთნაირსქესიანი წყვილის ან სქესის შეცვლასთან დაკავშირებული სამედიცინო ჩარევის „პოპულარიზაციისკენ არის მიმართული“. ასევე ნახეთ რუსული და უნგრული კანონები: ვინ და როგორ აკრძალა „ლგბტ პროპაგანდა“ ასევე ნახეთ რის ეშინია "ოცნებას" და სად ეძებს "ლგბტ პროპაგანდის" კვალს ასევე ნახეთ „ქართულ ოცნებას“ ლგბტ უფლებების შესაზღუდად კონსტიტუციის...