44 ქვეყანა, მათ შორის საქართველო, შეუერთდა უკრაინის მხარდამჭერ პოლიტიკურ დეკლარაციას, რომელიც 2 აპრილს ჰააგაში მიიღეს კონფერენციაზე „სამართლიანობის აღდგენა უკრაინისთვის“. დეკლარაციაში დაგმობილია უკრაინის წინააღმდეგ რუსეთის აგრესია. დოკუმენტის მხარდამჭერი ქვეყნები აუცილებლად მიიჩნევენ საერთო ძალისხმევის გაძლიერებას საერთაშორისო სამართლის დარღვევების გამოსაძიებლად და დამნაშავეებისთვის პასუხისმგებლობის დასაკისრებლად და ხაზს უსვამენ პროცესში უკვე ჩართული ყველა ინსტიტუტის, მათ შორის სისხლის სამართლის საერთაშორისო სასამართლოს როლს. სასამართლომ 2023 წლის მარტში გასცა რუსეთის პრეზიდენტ ვლადიმირ პუტინის დაპატიმრების ორდერი უკრაინიდან ბავშვების უკანონო დეპორტაციის გამო. ასევე ნახეთ პუტინის დაკავების ორდერი - რას ნიშნავს ჰააგის სასამართლოს გადაწყვეტილება?  ჰააგის კონფერენციაზე მიღებული დეკლარაციის მხარდამჭერი ქვეყნები ადასტურებენ, რომ იმუშავებენ სპეციალური ტრიბუნალის შექმნაზე, რათა რუსეთმა პასუხი აგოს უკრაინის წინააღმდეგ აგრესიის დანაშაულისთვის. დეკლარაციაში ასევე ნათქვამია, რომ რუსეთის სუვერენული აქტივები გაყინული დარჩება, სანამ არ შეწყვეტს აგრესიას უკრაინის წინააღმდეგ და მიყენებულ ზიანს არ აანაზღაურებს. უკრაინის საგარეო საქმეთა მინისტრმა დმიტრო კულებამ, რომელიც ჰააგის კონფერენციაში მონაწილეობდა, განაცხადა, რომ თუ ორი წლის წინ სპეციალური ტრიბუნალის იდეა უარყოფილი იყო, დღეს უმრავლესობას მკაფიოდ ესმის, რომ ალტერნატივა არ არსებობს. კულებამ მხარდამჭერ ქვეყნებს მადლობა გადაუხადა. უკრაინის საგარეო საქმეთა მინისტრი დარწმუნებულია, რომ ერთობლივი მუშაობის შედეგად სპეცტრიბუნალი რეალობად იქცევა. ...