საქართველოს პარლამენტის თავმჯდომარემ ოპოზიციონერ დეპუტატ ალეკო ელისაშვილს მიკროფონი გაუთიშა და სხდომათა დარბაზიდან გააძევა. შალვა პაპუაშვილმა თქვა, რომ ყველა იმ დეპუტატს გაუთიშავდა მიკროფონს, ვინც ახსენებდა „რუსულ კანონს“. დღევანდელ, 3 აპრილის პლენარულ სხდომაზე, პარტია „მოქალაქეების“ ლიდერმა ალეკო ელისაშვილმა თქვა, რომ „აგენტების კანონის“ პარლამენტში კიდევ ერთხელ შეტანით მმართველმა პარტიამ დეპუტატებსა და ხალხს შეურაცხყოფა მიაყენა. ასევე ნახეთ „ქართული ოცნება“ კვლავ აპირებს „აგენტების შესახებ“ კანონის მიღებას „ბატონო შალვა, იმ კანონის უკან შემოტრიალება ჩვენი ყველას შეურაცხყოფაა და ამ ქვეყნის, მინდა გითხრათ. ეს კანონის არის რუსული და ძახილის ნიშანი! რატომ არის და იმიტომ! ერთი ერთშია ნათარგმნი“, - თქვა „მოქალაქეების“ ლიდერმა. ალეკო ელისაშვილს გამოსვლა დასრულებული არ ჰქონდა, თუმცა შალვა პაპუაშვილმა მას მიკროფონი გაუთიშა. „ეს არის ანტიქართული პროპაგანდა, რასაც თქვენ აქ ეწევით ქართულ პარლამენტში. ანტიქართული პროპაგანდის უფლებას არ მოგცემთ. ყველას გავუთიშავ მიკროფონს, ვინც ახსენებს „რუსულ კანონს“, - თქვა შალვა პაპუაშვილმა. მას შემდეგ, რაც ალეკო ელისაშვილმა მიკროფონის გარეშე განაგრძო ლაპარაკი, პარლამენტის თავმჯდომარემ მისი სხდომათა დარბაზიდან გაძევების გადაწყვეტილება მიიღო. დღეს, 3 აპრილს, საპარლამენტო უმრავლესობის ლიდერმა მამუკა მდინარაძემ პარტია „ქართული ოცნების“ ოფისში განაცხადა, რომ კვლავ მიიღებენ ე.წ. აგენტების შესახებ კანონს. ამ კანონპროექტის პარლამენტში განხილვებმა გასულ წელს ათასობით ადამიანი გამოიყვანა ქუჩაში, მმართველი პარტია კი იძულებული გახდა, უარი ეთქვა მის მიღებაზე. „საზოგადოება მსგავს საკითხებს არ ატარებს. იცით ხომ, რამხელა პოლიტიკური რისკი ახლავს? შეიძლება ნებისმიერი ქვეყნის ხელისუფლება დამთავრდეს ასეთი საკითხების გადათქმის დროს“, - თქვა 2023 წლის 9 მარტს მამუკა მდინარაძემ რადიო თავისუფლების კითხვაზე პასუხის გაცემისას. მას ჟურნალისტმა ჰკითხა, მომავალში დაუბრუნდებოდა თუ არა „ქართული ოცნება“ ამ კანონის მიღების საკითხს. три ...