აშშ-ის წარმომადგენელთა პალატაში უკრაინის დახმარების შესახებ კენჭისყრა, სავარაუდოდ, აპრილის შუა რიცხვებამდე არ ჩატარდება, რადგან, როგორც Bloomberg-ი წერს, სპიკერი მაიკ ჯონსონი კვლავ ეძებს რესპუბლიკელი კონგრესმენების წინააღმდეგობის შერბილების გზებს. გამოცემის ცნობით, ჯონსონის გუნდმა რესპუბლიკელ დეპუტატებს დახმარების პაკეტის დეტალური გეგმა არ გაუზიარა, რადგან არ გადაუწყვეტია, თუ დაჟინებით რა დათმობას მოითხოვს ბაიდენის ადმინისტრაციისგან. როგორც რესპუბლიკური პარტიის წარმომადგენლებმა უთხრეს სააგენტო „ბლუმბერგს“, ასეთი დათმობის არარსებობის გამო სპიკერ ჯონსონს გაუჭირდება დროულად მოახერხოს სათანადო მხარდაჭერის მობილიზება მომავალი კვირის კენჭისყრამდე. აშშ-ის კონგრესის წარმომადგენელთა პალატის სპიკერმა მაიკ ჯონსონმა განაცხადა, რომ სააღდგომო არდადეგების შემდეგ, რომელიც 9 აპრილს სრულდება, კონგრესის ქვედა პალატა იმუშავებს უკრაინის დახმარების კანონპროექტზე. ჯონსონის სიტყვებით, მისი მიღება სირთულეებთან არის დაკავშირებული, ვინაიდან პალატაში დეპუტატების ძალები თითქმის თანაბრად არის გაყოფილი და დოკუმენტის მიღებისთვის ორივე პარტიის კანონმდებელთა მხარდაჭერაა საჭირო. „ჩვენ ხელს შევუწყობთ პროდუქტს, მაგრამ, ჩემი აზრით, მასში რამდენიმე მნიშვნელოვანი სიახლე იქნება“, - თქვა ჯონსონმა. ასეთი სიახლეების მაგალითად მან დაასახელა უკრაინისთვის დახმარების მინიჭების შესაძლებლობა სესხის სახით, რასაც მხარს უჭერს ყოფილი პრეზიდენტი დონალდ ტრამპი, რომელიც წლევანდელ საპრეზიდენტო არჩევნებში რესპუბლიკელთა სავარაუდო კანდიდატი იქნება. კიდევ ერთი იდეა, რომელიც ახსენა ჯონსონმა, არის რუსეთის ამჟამად გაყინული აქტივების კონფისკაცია და მათი გადაცემა უკრაინისთვის, რასაც ევროკავშირთან სინქრონული მოქმედება ესაჭიროება. თეთრი სახლი წარმომადგენელთა პალატას მოუწოდებს, მიიღოს უკრაინის დახმარების კანონპროექტი, რომელიც 60 მილიარდ დოლარზე მეტს ითვალისწინებს და რომელიც ადრე უკვე მოიწონა სენატმა. მაგრამ ჯონსონის სიტყვები მეტყველებს, რომ ის შეეცდება ან კანონპროექტში შესწორებების შეტანას, ან ახალი დოკუმენტის მიღებას. ასეთ შემთხვევაში წარმომადგენელთა პალატის მიერ კანონპროექტის მიღების შემდეგ ის კვლავ უნდა მოიწონოს სენატმა. ეს ნიშნავს, რომ დოკუმენტის მიღება გაჭიანურდება. ასევე ნახეთ აშშ-ის წარმომადგენელთა პალატის სპიკერი ჯონსონი მხარს უჭერს უკრაინის დახმარებას, მაგრამ გარკვეული "სიახლეებით" ასევე ნახეთ ვის ხედავენ ომში გამარჯვებულად და ვინ არის მზად უკრაინის დასახმარებლად ევროპაში? ...