ქართული პრორუსული პარტია "კონსერვატიული მოძრაობის" ლიდერ ზურაბ მახარაძესა და ამავე პარტიის კიდევ ერთ წევრს, გიორგი გოგიას, ჯგუფური ძალადობის საქმეზე ზუგდიდის რაიონული სასამართლოს მოსამართლე ეკატერინე ბებიამ აღმკვეთ ღონისძიებად გირაოს, 5000-5000 ლარის, გადახდა დააკისრა. ამ გადაწყვეტილებით სასამართლომ საქართველოს პროკურატურის შუამდგომლობა სრულად დააკმაყოფილა. სასამართლოს გადაწყვეტილებას ბრალდებულების მხარდამჭერთა უკმაყოფილება მოჰყვა დარბაზში. იყო შეძახილები, რომ ეს არის პოლიტიკური ზეწოლა. ზურაბ მახარაძემ და გიორგი გოგიამ განაცხადეს, რომ წარდგენილ ბრალს არ აღიარებენ და უდანაშაულო არიან. ზურაბ მახარაძის თქმით, ის არ აპირებს გირაოს გადახდას, რადგან უდანაშაულოა. მან სასამართლოს გადაწყვეტილება “წინასაარჩევნოდ პოლიტიკურ ზეწოლად” შეაფასა. ბრალდების ინფორმაციით, ზურაბ მახარაძემ და გიორგი გოგიამ 23 მარტს ზუგდიდში, რუსთაველის ქუჩის მიმდებარე ტერიტორიაზე, ურთიერთშელაპარაკების ნიადაგზე რამდენიმე პირზე ფიზიკურად იძალადეს. კერძოდ, უწყების ცნობით, ზურაბ მახარაძემ ერთი პირის, ხოლო გიორგი გოგიამ ორი პირის მიმართ იძალადა. ბრალდებულების ადვოკატმა სერგო ხურციძემ განაცხადა, რომ სასამართლოს გადაწყვეტილებას გაასაჩივრებენ. მისი თქმით, ზურაბ მახარაძე და გიორგი გოგია უდანაშაულო არიან, სასამართლომ დღევანდელი გადაწყვეტილებით კი დაადასტურა, რომ მიკერძოებულია და პროკურატურის მითითებებს ასრულებს. ადვოკატისვე განმარტებით, 23 მარტს "კონსერვატიული მოძრაობის" წევრებს შეხვედრა ჰქონდათ ოფისში, რა დროსაც ადგილზე მივიდნენ მოქალაქეები, რომლებიც პროვოკაციულად იქცეოდნენ, მოგვიანებით კი პოლიცია გამოიძახეს იმ მიზეზით, თითქოს მათზე იძალადეს. ბრალდება ზურაბ მახარაძეს საქართველოს სისხლის სამართლის კოდექსის 126-ე მუხლის პირველი პრიმა ნაწილის „ბ“ ქვეპუნქტით (ძალადობა, ჩადენილი ჯგუფურად), ხოლო გიორგი გოგიას „გ“ ქვეპუნქტით (ძალადობა, ჩადენილი ორი პირის მიმართ) 3 აპრილს წარედგინა. ...