ძლიერი აფეთქებები იყო რუსეთის როსტოვის ოლქის მოროზოვსკის რაიონში, სადაც სამხედრო აეროდრომი მდებარეობს. რუსული ტელეგრამ-არხები, მათ შორის პროპაგანდისტული, წერენ, რომ ღამის განმავლობაში მოროზოვსკზე უპილოტო საფრენი აპარატებით „მასირებული შეტევა“ იყო. ადგილობრივ მცხოვრებთა ინფორმაციით, აფეთქებები იყო აეროდრომის რაიონშიც. უკრაინის მოსაზღვრე როსტოვის ოლქის გუბერნატორ ვასილი გოლუბევის წინასწარი მონაცემებით, საჰაერო თავდაცვის ძალებმა 40-ზე მეტი „სამიზნე გაანადგურეს“. გოლუბევი ადასტურებს ელექტროქვესადგურის დაზიანებას, თუმცა ჯერჯერობით არაფერს ამბობს სამხედრო აეროდრომის შესახებ. რუსული წყაროების თანახმად, მოროზოვსკის აეროდრომზე დისლოცირებულია სუ-24 და სუ-34 ტიპის ბომბდამშენები. ასევე ნახეთ რუსეთში დრონებით დარტყმა იყო, სავარაუდოდ, დრონების მწარმოებელ ქარხანაზე რუსეთის რეგიონების ნაწილზე დრონებით შეტევა პრაქტიკულად, ყოველდღე ხდება. სამიზნეებს შორისაა სხვადასხვა ობიექტი, მათ შორის ნავთობგადამამუშავებელი ქარხნები. რუსეთი უკრაინას ადანაშაულებს „ტერორისტულ შეტევებში". კიევი ცალკეულ შემთხვევებზე ოფიციალურ კომენტარს, როგორც წესი, არ აკეთებს. ამასთან, უკრაინის სამხედრო დაზვერვის და უსაფრთხოების სამსახურის წარმომადგენლები ანონიმურობის დაცვის პირობით, მედიასაშუალებებს უდასტურებენ, რომ რუსეთის რეგიონებზე დრონებით შეტევები უკრაინის სპეცოპერაციაა. უპილოტო საფრენი აპარატებით დარტყმის სამიზნე რეგიონებს 2 აპრილს დაემატა რუსეთის თათრეთის რესპუბლიკაც, სადაც დრონებით შეტევა იყო ქალაქებში, ელაბუგასა და ნიჟნეკამსკში მდებარე საწარმოებზე. ადგილობრივმა ხელისუფლებამ დაადასტურა, რომ ნიჟნეკამსკში სამიზნე იყო ნავთობგადამამუშავებელი ქარხანა. უკრაინის რამდენიმე მედიასაშუალება უსაფრთხოების სამსახურის და თავდაცვის სამინისტროს დაზვერვის მთავარი სამმართველოს წარმომადგენლებზე დაყრდნობით წერდა, რომ ნიჟნეკამსკის ქარხნის გარდა, დრონებით შეუტიეს ელაბუგის ქარხანასაც, რომელიც ირანული „შაჰედის" ტიპის უპილოტო საფრენ აპარატებს აწარმოებს. უკრაინას, რომელიც ორი წელია რუსეთის სამხედრო აგრესიას ებრძვის, კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსეთის არმიის მომარაგებაზე მუშაობენ. ასევე ნახეთ ნავთობგადამამუშავებელ ქარხნებზე დრონებით შეტევამ რუსეთს 14%-ით შეუმცირა ბენზინის წარმოება ...