ბელარუსის პოლიტიკური ოპოზიციის ერთ-ერთი წამყვანი ფიგურა, მარია კალესნიკავა, უკვე ერთი წელიწადია სამარტოო საკანშია, სრულ იზოლაციაში. ამის შესახებ რადიო თავისუფლების ბელარუსული სამსახური იტყობინება წყაროზე დაყრდნობით. კალესნიკავას ნათესავებმა ბოლო წერილი მისგან შარშან, 15 თებერვალს, მიიღეს. ბელარუსის ხელისუფლება ნათესავებს ინფორმაციას არ აძლევს. ცნობილია მხოლოდ ის, რომ 2021 წელს გამოტანილი განაჩენის შემდეგ კალესნიკავა გადაიყვანეს გომელის ქალთა მე-4 კოლონიაში, სადაც მოათავსეს საჯარიმო იზოლატორში. წყაროს ინფორმაციით, კალესნიკავა არის სამარტოო საკანში, რაც საკნის ტიპის სივრცეს წარმოადგენს. იქ პატიმრის მოთავსება კანონით მხოლოდ ექვსი თვითაა დაშვებული. მაგრამ კალესნიკავა, წყაროს თანახმად, „რამდენიმე დღით გადაიყვანეს საჯარიმო იზოლატორში და შემდეგ კვლავ სამარტოო საკანში დააბრუნეს“. სამარტოო იზოლატორში პატიმრებს არ აქვთ ლეიბი, ბალიში, საბანი, საწოლი თეთრეული და ზედა სამოსი. კალესნიკავას საპატიმროში ყოფნის პერიოდში ოპერაცია გაუკეთეს და წყაროს თანახმად, მას კვლავ ჰქონდა ჯანმრთელობის პრობლემები. 2021 წლის სექტემბერში კალესნიკავა ხელისუფლების მიტაცების მიზნით შეთქმულებაში, სახელმწიფო უსაფრთხოებისთვის საფრთხის შემქმნელ მოწოდებებსა და ექსტრემისტული ორგანიზაციის დაფუძნებაში ცნეს დამნაშავედ. უფლებადამცავი ორგანიზაციები მას პოლიტიკურ პატიმრად მიიჩნევენ. ხელისუფლებას რეაგირება არ ჰქონია კალესნიკავას ადვოკატების საჩივრებზე, რომლებიც შეიცავს მისი ჯანმრთელობის შესახებ შეშფოთებას. მარია კალესნიკავა ოპოზიციონერი კანდიდატის, ვიქტორ ბაბარიკას შტაბის ხელმძღვანელი იყო 2020 წლის საპრეზიდენტო არჩევნებზე, რომელიც მასშტაბური საპროტესტო აქციებითა და მთავრობის მიერ მათი სასტიკი ჩახშობით დასრულდა. ვიქტორ ბაბარიკას დაპატიმრების მერე იგი მუშაობდა მეორე კანდიდატის, სვიატლანა ციხანოუსკაიას გუნდში. ასევე ნახეთ ბელარუსის ოპოზიციის წამყვანი აქტივისტი მარია კალესნიკავა გომელის ქალთა კოლონიაში გადაიყვანეს ასევე ნახეთ სასამართლომ მარია კალესნიკავას 11, ხოლო მაქსიმ ზნაკს 10 წლით პატიმრობა მიუსაჯა ...