ღამის განმავლობაში რუსეთის მხრიდან დრონებით განხორციელდა შეტევა უკრაინის ქალაქ ხარკოვზე, რასაც სულ მცირე ექვსი ადამიანი ემსხვერპლა, დაიჭრა 10 ადამიანი - იუწყებიან უკრაინის წარმომადგენლები. ბოლო პერიოდში სულ უფრო ხშირია თავდასხმები უკრაინის ამ, სიდიდით მეორე ქალაქზე. 6 აპრილს თავდასხმა ადგილობრივი დროით შუაღამისას მოხდა, რამაც გააძლიერა ვარაუდები, რომ რუსეთის ძალები შესაძლოა ემზადებოდნენ ოპერაციისთვის ხარკოვის დასაკავებლად, მომავალ თვეებში. ორი დღით ადრე რუსეთის მხრიდან დრონებით შეტევას ემსხვერპლა ოთხი ადამიანი, მათ შორის სასწრაფო დახმარების სამი თანამშრომელი, რომლებიც კიდევ უფრო ადრინდელ თავდასხმაზე რეაგირებდნენ. ხარკოვის მერის, იჰორ ტერეხოვის თქმით, ირანის მიერ წარმოებული დრონები მოხვდა სულ მცირე ცხრა მაღალსართულიან ნაგებობას, სამ საერთო საცხოვრებელს და საწვავის სადგურს. უკრაინის არმია აცხადებს, რომ სხვა არეალებში მისმა საჰაერო თავდაცვამ გაანადგურა 28 დრონი რუსეთის მიერ გაშვებული 32 დრონიდან და სამი რაკეტა რუსეთის ექვსი რაკეტიდან. ასევე ნახეთ ხარკოვის მერი: რუსეთის ჯარებმა გაანადგურეს ქალაქის პრაქტიკულად მთელი კრიტიკული ინფრასტრუქტურა ...