რუსეთის ფედერალურმა ტელეარხებმა აჩვენეს ვიდეო, რომელშიც, როგორც ამტკიცებენ, ნაჩვენებია „კროკუს სიტი ჰოლის“ საკონცერტო დარბაზზე თავდასხმის მონაწილეების დაკითხვა. 22 მარტს განხორციელებულ ამ ტერაქტს 144 ადამიანის სიცოცხლე ემსხვერპლა. ვიდეო ფსბ-სგან მოიპოვეს. ნაწყვეტები აჩვენა პირველმა არხმა „როსია-1“-მა. ვიდეოჩანაწერში ფიგურირებს ტერაქტის ოთხი სავარაუდო შემსრულებელი, რომლებიც თავდასხმიდან მეორე დღეს დააკავეს. ისინი ყველანი ირწმუნებიან, რომ მათ მოქმედებებს კოორდინაციას უწევდა ვინმე საიფულო, რომელმაც თითქოს ტერაქტის შემდეგ უთხრა მათ, რომ „კიევის მიმართულებით“ გამგზავრებულიყვნენ. გარდა ამისა, როგორც ეჭვმიტანილთაგან ორნი, მუჰამადსობირ ფაიზოვი და საიდაკრამი რაჩალიზოდა ამბობენ, მათ დაჰპირდნენ, რომ კიევში თითოს მილიონ რუბლს მისცემდნენ. ფაიზოვის თქმით, უკრაინა-რუსეთის საზღვარზე მათ უნდა დახვედროდნენ „ბიჭები, რომლებიც დაეხმარებოდნენ... საზღვრის გადალახვაში და კიევში ჩასვლაში“. დანარჩენი ორი ეჭვმიტანილი, ფარიდუნი შამსიდინი და დალერჟონ მირზოევი, ამის შესახებ განსხვავებულად ლაპარაკობენ. მათი თქმით, „საიფულომ“ მათ უთხრა, მანქანა საზღვრის მახლობლად მიეტოვებინათ და მისთვის დაერეკათ ინსტრუქციებისთვის. რუსეთის პირველი არხის სიუჟეტის ავტორები ამის შემდეგ ირწმუნებიან, რომ სანამ „კროკუსზე“ თავდამსხმელები უკრაინის საზღვრისკენ მიემგზავრებოდნენ, უკრაინის ტერიტორიაზე მათთვის თითქოს მოამზადეს ორი დერეფანი საზღვრის გადასაკვეთად, რისთვისაც ორი მონაკვეთი ნაღმებისგან გაწმინდეს. თავად ბრალდებულები ამის შესახებ არ ლაპარაკობენ, არ მოიპოვება ამ ინფორმაციის დამადასტურებელი საბუთები დამოუკიდებელი წყაროებიდან. საზღვარზე „ფანჯრის“ შესახებ ტერაქტის შემდეგ პირველივე დღეს განაცხადა რუსეთის პრეზიდენტმა ვლადიმირ პუტინმა. ასევე ნახეთ „ასე თუ გაწამეს, იმასაც იტყვი, რომ ზელენსკიმ მიკი მაუსი მოგიგზავნა, 5 მილიონით კონვერტში“ - მალკოლმ ნანსი სიუჟეტში ასევე აჩვენეს უკრაინის დროშის ფოტოები, რომლებიც თითქოს ბრალდებულთა მობილურ ტელეფონებში იპოვეს. როგორც რადიო თავისუფლებამ აღმოაჩინა, ერთ-ერთი მათგანი არის ფოტობანკიდან Depositphotos თემაზე „უკრაინის არმია“. ადრე „აგენტსტვომ“ აღმოაჩინა, რომ კოლაჟი, რომელიც თითქოს იპოვეს ტელეფონში, ერთი წლის წინ გამოჩნდა ინტერნეტში. ოთხივე ბრალდებულის წინააღმდეგ ძალადობა იქნა გამოყენებული, სავარაუდოდ ისინი აწამეს დაკავებისას და უშუალოდ მის შემდეგ. კერძოდ, ერთ-ერთ მათგანს ყურის ნაწილი მოაჭრეს, მეორე სავარაუდოდ ელექტროშოკით აწამეს. შესაბამის ფოტოებს აქვეყნებენ ომის მომხრე რუსული ტელეგრამის არხები. როდის და რა ვითარებაში გადაიღეს ვიდეო, რომელიც ფედერალური არხებით აჩვენეს, უცნობია. თავდასხმის შემდეგ პირველ დღეს რუსეთის ხელისუფლების წარმომადგენლები აცხადებდნენ ტერ...