ევროკავშირის საერთო იურისდიქციის სასამართლომ გაუმართლებლად მიიჩნია რუსი მილიარდერების, „ალფა-ბანკის“ დამფუძნებლების, პიოტრ ავენისა და მიხაილ ფრიდმანისთვის სანქციების დაწესება. სასამართლოს მიერ დღეს, 10 აპრილს, გამოქვეყნებული გადაწყვეტილებით, ევროკავშირის მიერ ავენის და ფრიდმანის სანქცირების მიზეზები საკმარისად დასაბუთებული არ იყო. ევროკავშირმა ავენს და ფრიდმანს სანქციები დაუწესა და მათი აქტივები გაყინა 2022 წელს, უკრაინაში რუსეთის ფართომასშტაბიანი შეჭრის შემდეგ. ევროპულმა საბჭომ სანქცირება იმით ახსნა, რომ პუტინთან კავშირის მქონე ავენი და ფრიდმანი თავისი რესურსებით მხარს უჭერენ უკრაინის ტერიტორიული მთლიანობის, სუვერენიტეტის და დამოუკიდებლობის ხელყოფას. ასევე ნახეთ ნავალნის თანამებრძოლმა, ვოლკოვმა შეაჩერა საზოგადოებრივი საქმიანობა ევროკავშირისთვის მიწერილი წერილის გამო დაპირისპირების ფონზე ფრიდმანმა და ავენმა, რომლებიც აცხადებდნენ, რომ ევროკავშირს არანაირი მტკიცებულება არ აქვს, სანქცირების გადაწყვეტილება ევროკავშირის სასამართლოში გაასაჩივრეს. სასამართლომაც მიიჩნია, რომ გადაწყვეტილება არანაირ მტკიცებულებებს არ ეფუძნებოდა. ევროპულ საბჭოს ამ გადაწყვეტილების სააპელაციო წესით გასაჩივრება შეუძლია. პიოტრ ავენი და მიხაილ ფრიდმანი, რომლებმაც უკრაინაში ომის დაწყების შემდეგ რუსეთი დატოვეს, სანქცირებული არიან ამერიკის შეერთებული შტატების, დიდი ბრიტანეთის და კიდევ რამდენიმე ქვეყნის მიერ. ...