სამცხე-ჯავახეთის მუფთი მამუკა ვაშაყმაძე და ადიგენში, წერეთლის ქ.N18-ში მცხოვრები მერაბ მიქელაძე სოციალურ ქსელში ვიდეომიმართვას ავრცელებენ. ორივე მათგანი მუსლიმ მრევლს ბაირამობას ულოცავს და აღნიშნავს, რომ ადიგენში, მეჩეთადქცეულ სახლში, პარასკევის ლოცვა აღარ გაიმართება. „ჭელაში შემდგარ შეხვედრაზე მუსლიმ თემთან ერთად ცხარე დისკუსიის შემდეგ იქნა გადაწყვეტილება მიღებული, რომ შეჩერდეს პარასკევის ლოცვა, ბაირამის ლოცვა და გადავიდეს მოლაპარაკების ფორმატში, ცივილიზებულ ფორმატში ეს ყველაფერი", - აღნიშნავს სამცხე-ჯავახეთის მუფთი მერაბ ვაშაყმაძე. გავრცელებული ვიდეომიმართვით ირკვევა, რომ გადაწყვეტილება მუსლიმმა თემმა სოფელ ჭელაში გამართულ შეხვედრაზე ცხარე დისკუსიის შედეგად მიიღო. „ჩვენ ადიგენში აღნიშნული პრობლემებისა და მიზეზების გამო შევაჩერეთ პარასკევის ლოცვა, ბაირამის ლოცვა, დანარჩენი ყველაფერი მიდის მოლაპარაკებების ტემპით და იმ გზით“, - აღნიშნავს მერაბ მიქელაძე. ერთი დღით ადრე, ადიგენის მუნიციპალიტეტში მცხოვრები მართლმადიდებლები აცხადებდნენ, რომ პარასკევს ადიგენში, მეჩეთადქცეულ სახლთან მისვლას გეგმავდნენ. „არავითარ შემთხვევაში არ აქვთ უფლება, საცხოვრებელი სახლი გადააქციონ სალოცავად. თუ ჩვენ ეკლესიის მშენებლობისათვის ვიღებთ ნებართვას მშენებლობაზე და ყველა შესაბამის პროცედურას გავდივართ, ისინი რატომ არ მიმართავენ ამ ხერხს? ურჩევნიათ კანონის გვერდის ავლით, თითქოს უმცირესობის დაცვის საბაბით ფონს გასვლა“, - მიაჩნია ბესიკ ბოჩიკაშვილს. მოქალაქეთა ორგანიზება მას შემდეგ დაიწყო, რაც გავრცელდა ინფორმაცია, რომ პარასკევის ტრადიციულ ლოცვაზე ელოდებოდნენ მუსლიმების ჩამოსვლას ხულოდან. დღეს, 10 აპრილს, ორივე მხარემ განაცხადა, რომ მზად არიან ცივილიზებულ ფორმატში მოლაპარაკებების გასაგრძელებლად. 5 აპრილს „ესკალაციის თავიდან ასაცილებლად“ დაპირისპირებულ მხარეებს შორის პოლიციას მოუწია ჩადგომა. ასევე ნახეთ პოლიციამ ადიგენში გზა გადაკეტა - მიზეზი მართლმადიდებელ და მუსლიმ თემს შორის მოსალოდნელი დაპირისპირებაა მეჩეთადქცეული სახლის დათმობის სანაცვლოდ, რელიგიის სააგენტო მუსლიმ თემს ადიგენიდან რამდენიმე კილომეტრში, სოფელ იჯარეთში, მეჩეთის ასაშენებლად ან შენობის შესაძენად 50 ათას ლარამდე თანხას სთავაზობს. მერაბ მიქელაძემ კი რამდენიმე დღის წინ თქვა, რომ იჯარეთში მეჩეთის აშენებას ემხრობა, მაგრამ სახლის გაყიდვას არ აპირებს და სალოცავად მასთან თუ ვინმე მივა, ხელს არ შეუშლის. „სახლს რაც შეეხება, ვერავინ მაიძულებს გავყიდო“, - აღნიშნა მან. მუსლიმთა ლოცვის გასაპროტესტებლად დაბა ადიგენში 8 მარტსაც შეიკრიბნენ. მაშინ ფიზიკური დაპირისპირება მოხდა. „ესკალაციის თავიდან არიდების მიზნით", სახლთან მაშინაც მობილიზებული იყო პოლიცია. მერაბ მიქელაძისგან პირობა მიიღეს, რომ ლოცვა არ ჩატ...