უნგრეთის პარლამენტმა მოიწონა ევროპაში ჩვეულებრივი შეიარაღების შესახებ ხელშეკრულებაში ქვეყნის მონაწილეობის შეწყვეტა. ამ ზომას მხარი დაუჭირა პარლამენტის 177-მა წევრმა, ხუთი წინააღმდეგი იყო. ახლა გადაწყვეტილებას სახელმწიფოს მეთაურმა უნდა მოაწეროს ხელი. ნატოს ქვეყნებმა, მათ შორის უნგრეთმა, შარშან ნოემბერში მიიღეს ერთობლივი განცხადება იმის თაობაზე, რომ უვადოდ წყვეტენ ხელშეკრულებაში მონაწილეობას. ეს იყო რეაქცია ხელშეკრულებიდან რუსეთის გასვლაზე 2023 წლის 7 ნოემბერს. ევროპაში ჩვეულებრივი შეიარაღების შესახებ ხელშეკრულებაში მონაწილეობა მოსკოვმა ჯერ კიდევ 2007 წელს შეაჩერა, 2023 წლის ნოემბერში კი დასრულდა საბოლოო პროცედურები. შარშან დეკემბერში ხელშეკრულებიდან გავიდა შეერთებული შტატები, წელს მარტში ხელშეკრულება დატოვეს პოლონეთმა და მოლდოვამ, აპრილში - თურქეთმა და ბელარუსმა. ნატოს სხვა ქვეყნები ასევე ატარებენ მის დენონსაციასთან დაკავშირებულ ფორმალურ პროცედურებს. ასევე ნახეთ რუსული და უნგრული კანონები: ვინ და როგორ აკრძალა „ლგბტ პროპაგანდა“ ევროპაში ჩვეულებრივი შეიარაღების შესახებ ხელშეკრულებას 1990 წელს პარიზში მოაწერეს ხელი ნატოსა და ვარშავის ხელშეკრულების წევრმა ქვეყნებმა. დოკუმენტი განახლდა 1999 წელს, მაგრამ მას რატიფიკაცია გაუკეთა მხოლოდ ოთხმა მონაწილემ - რუსეთმა, უკრაინამ, ყაზახეთმა და ბელარუსმა. ხელშეკრულება მონაწილეებს შეზღუდვებს უწესებდა საბრძოლო ტანკების, დაჯავშნილი მანქანების, არტილერიის, მოიერიშე ვერტმფრენებისა და თვითმფრინავების რაოდენობაში. 2007 წელს რუსეთის პრეზიდენტმა ვლადიმირ პუტინმა ხელი მოაწერა ბრძანებულებას ხელშეკრულებისა და მასთან დაკავშირებული საერთაშორისო დოკუმენტების მოქმედების შეჩერების შესახებ მანამდე, სანამ ნატოს წევრი ქვეყნები რატიფიკაციას არ გაუკეთებდნენ მას. ჩრდილოატლანტიკურმა კავშირმა მაშინ განაცხადა, რომ მოსკოვის მოქმედებები ხელს არ უწყობს ევროპაში უსაფრთხოების უზრუნველყოფას. ...