გერმანიის ყოფილმა კანცლერმა გერჰარდ შრიოდერმა სასამართლო დავა წააგო ტაბლოიდ Bild-თან. რუსეთის პრეზიდენტ პუტინის მეგობარმა შრიოდერმა გერმანულ გამოცემას სასამართლოში 2020 წელს უჩივლა რუსი ოპოზიციონერი პოლიტიკოსის, ალექსეი ნავალნის ინტერვიუს გამო. 2020 წლის ოქტომბერში, ნავალნიმ, რომელიც რუსეთში მოწამვლის შემდეგ რეაბილიტაციის კურსს გერმანულ კლინიკაში იტარებდა, Bild-თან ინტერვიუში შრიოდერს უწოდა „პუტინის ხელის ბიჭი, რომელიც მკვლელს იცავს“ და რუსეთისგან ფულს ფარულადაც იღებს. გერმანიის ყოფილმა კანცლერმა სასამართლოში იმ მოტივით იჩივლა, რომ გამოცემამ მცდარი ინფორმაცია გამოაქვეყნა და მისთვის ნავალნის ბრალდებაზე კომენტარი არ უთხოვია. შრიოდერი მოითხოვდა, რომ სასამართლოს ალექსეი ნავალნის განცხადების გავრცელება აეკრძალა. გერმანული მაუწყებლის, DW-ს ცნობით, 2024 წლის 10 აპრილს ცნობილი გახდა, რომ ჰამბურგის სასამართლომ შრიოდერის სარჩელი არ დააკმაყოფილა. ასევე ნახეთ გერმანიის ყოფილი კანცლერი მოსკოვში ჩავიდა და „როსნეფტის“ ოფისთან დასახლდა გერჰარდ შრიოდერი, რომელსაც 7 აპრილს 80 წელი შეუსრულდა, გერმანიის ფედერალური კანცლერი იყო 1998-2005 წლებში. სოციალ-დემოკრატი შრიოდერი 2005 წლის არჩევნებში თავისი პარტიის დამარცხების და კანცლერის თანამდებობიდან წასვლის შემდეგ, რუსეთის პრეზიდენტ პუტინის შეთავაზებით, 2006 წელს გახდა გაზსადენ „ჩრდილოეთის ნაკადის“ პროექტზე მომუშავე კომპანიის აქციონერთა კომიტეტის ხელმძღვანელი. 2017 წლიდან შრიოდერი იყო რუსული კომპანია „როსნეფტის“ დირექტორთა საბჭოს თავმჯდომარე. რუსული წყაროების თანახმად, ამ თანამდებობაზე შრიოდერის წლიური ანაზღაურება 600 ათასი დოლარი იყო. გერმანიის ყოფილმა კანცლერმა „როსნეფტი“ უკრაინაში რუსეთის შეჭრიდან სამ თვეში, 2022 წლის მაისში, დატოვა მას შემდეგ, რაც სანქცირების საფრთხე შეექმნა. შრიოდერს სხვადასხვა ინტერვიუში არაერთხელ უთქვამს, რომ პუტინთან მეგობრობს. ...