"უცხოური გავლენის გამჭვირვალობის შესახებ" კანონის მიღების წინააღმდეგ ქუთაისში სამოქალაქო და მედიაორგანიზაციების წარმომადგენლები, აქტივისტები და სხვადასხვა პროფესიის ადამიანები მერიის შენობასთან შეიკრიბნენ პლაკატებით, რომლებზეც ეწერა: „არა რუსულ კანონს!“ ე.წ. აგენტების კანონი, რომელსაც მმართველი პარტია „გამჭვირვალობის კანონს“ უწოდებს, აქციის მონაწილეთა აზრით, სამოქალაქო საზოგადოების დისკრედიტაციას ისახავს მიზნად. "ეს არის კრიტიკული სამოქალაქო საზოგადოების დისკრედიტაციის კანონი, რათა მათ დაეკარგოთ საზოგადოების თვალში ფასი და მათი კრიტიკა ხელისუფლების საქმიანობის მიმართ არ იყოს სწორად აღქმული მოქალაქეების მხრიდან, ხელისუფლება ამით ვადის გახანგრძლივებას ცდილობს", - უთხრა რადიო თავისუფლებას აქციის ერთ-ერთმა მონაწილემ, მასწავლებელმა მიხეილ მუმლაძემ. "ამ კანონპროექტზე მსუბუქი იყო 2012 წელს რუსეთში მიღებული კანონი და 10 წელიწადში მასში განხორციელებული ცვლილებებით, რუსეთში დამყარდა რეჟიმი. კანონი თავისი არსით ეწინააღმდეგება ევროპულ ღირებულებებს", - ამბობს აქციის კიდევ ერთი მონაწილე, ადვოკატი ვალერი თევდორაძე. საპროტესტო აქცია იმართება თბილისში, პარლამენტის შენობასთანაც. პარლამენტის იურიდიულ საკითხთა კომიტეტში დღეს, 15 აპრილს, დაიწყო სადავო კანონპროექტის განხილვა. ასევე ნახეთ ანრი ოხანაშვილი "აგენტების კანონის" "რუსულ კანონად" მოხსენიებას დეზინფორმაციად თვლის და კოლეგა დეპუტატებს მიკროფონს უთიშავს "ქართულმა ოცნებამ“ ე.წ. აგენტების კანონი 3 აპრილს ხელახლა დაარეგისტრირა. ამ კანონის მიღების მცდელობამ 2023 წლის მარტში მასობრივი საპროტესტო აქციები გამოიწვია. საბოლოოდ მმართველმა პარტიამ კანონპროექტი გაიწვია. ...