თბილისში, პარლამენტის შენობასთან, სადაც მოქალაქეები "აგენტების კანონის" წინააღმდეგ აქციას მართავენ, სპეცდანიშნულების რაზმები გამოჩნდა. პოლიციის კორდონებმა გადაკეტა პარლამენტის შენობისკენ მიმავალი ქუჩები. სპეცრაზმის გამოჩენის პარალელურად განცხადებას ავრცელებს შინაგან საქმეთა სამინისტრო. "შინაგან საქმეთა სამინისტრო მოუწოდებს აქციის ორგანიზატორებსა და მონაწილეებს, არ გასცდნენ გამოხატვის თავისუფლებისა და მშვიდობიანი შეკრების კანონით დადგენილ ნორმებს. აქციის მიმდინარეობისას, სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი" - ნათქვამია გამაფრთხილებელ განცხადებაში. აქციის პარალელურად საკანონმდებლო ორგანოში, იურიდიულ კომიტეტში გრძელდება "აგენტების კანონის" განხილვა. ასევე ნახეთ სრული სიმართლე „აგენტების კანონზე“ საქართველოს პარტნიორი ქვეყნებისა და ორგანიზაციების შეფასებით, ე.წ. აგენტების კანონი ხელს შეუშლის ქვეყნის ევროინტეგრაციას, მმართველი პარტია კი ამტკიცებს, რომ ის ევროპულია. საქართველოში საპარლამენტო უმრავლესობა 2023 წლის მარტში ხალხმრავალი აქციებისა და საერთაშორისო კრიტიკის გამო იძულებული გახდა "უცხოეთის აგენტების კანონი" ჩაეგდო და პირობა დადო, რომ პროექტს აღარ დაუბრუნდებოდა. „ქართულმა ოცნებამ“ კანონპროექტი 2024 წლის 3 აპრილს დააბრუნა პარლამენტში. ტერმინი „უცხოური გავლენის აგენტი“ პროექტში მან "უცხო ძალის ინტერესების გამტარებელი ორგანიზაციით" ჩაანაცვლა. ...