კრემლმა გამოაცხადა 17 აპრილს, რომ "რუსეთის სამშვიდობო ძალებმა" დაიწყეს მთიანი ყარაბაღის დატოვება მას მერე, რაც აზერბაიჯანმა ბრძოლის შემდეგ დაიბრუნა კონტროლი თავისი რეგიონზე. ამ კვირაში აზერბაიჯანის მედია იტყობინებოდა, რომ რუსეთის ჯარებმა დაიწყეს პოზიციების დატოვება, რომელიც 2020 წელს დაიკავეს ერევანსა და ბაქოს შორის მოსკოვის შუამავლობით მიღწეული ზავის შედეგად. გავრცელდა ვიდეოჩანაწერები და ფოტოგრაფიები, სადაც ჩანს, სავარაუდოდ, სამხედრო ტექნიკა რუსეთის დროშებით გადის ქვეყნის ტერიტორიიდან. რუსეთის მთავრობის პრესმდივანმა, დმიტრი პესკოვმა შეკითხვას ცნობების თაობაზე, რომ „რუსეთის სამშვიდობო ძალები“ ტოვებენ რეგიონს, უპასუხა, რომ „კი, ეს სიმართლეა“. პესკოვს დეტალებზე არ ულაპარაკია. რუსეთმა სამშვიდობო ძალები - ორი ათასი სამხედრო - განათავსა მთიანი ყარაბაღის რეგიონში ექვსკვირიანი ომის შემდეგ მიღწეული შეთანხმების ჩარჩოებში. 2020 წლის ომის შედეგად აზერბაიჯანმა მოახერხა რეგიონის და მიმდებარე არეალების დაკავება. ბაქომ ტერიტორიის დაკავება დაასრულა შარშან სექტემბერში ელვისებური იერიშით, რასაც მოჰყვა კრიზისი - მთიანი ყარაბაღის მოსახლეობის თითქმის მთლიანად გასვლა სომხეთში რეპრესიების შიშით. მთიანი ყარაბაღი საერთაშორისოდ აღიარებულია აზერბაიჯანის ტერიტორიად, სადაც უმრავლესობას სომხური მოსახლეობა წარმოადგენდა და თითქმის სამი ათწლეულის მანძილზე მას სეპარატისტული ძალები მართავდნენ. კონფლიქტმა დაარღვია კავშირები ტრადიციულ მოკავშირეებს რუსეთს და სომხეთს შორის, რის ფონზეც მოსკოვს ბაქოსთან თბილი ურთიერთობა აქვს. სომხეთის პრემიერ-მინისტრმა, ნიკოლ ფაშინიანმა ცოტა ხნის წინ განაცხადა, რომ ერევანმა დე ფაქტო შეაჩერა მონაწილეობა მოსკოვის ხელმძღვანელობით მოქმედ თავდაცვის ალიანსში - „კოლექტიური უსაფრთხოების ხელშეკრულების ორგანიზაციაში“ (CSTO), მან არაერთხელ გააკრიტიკა რუსეთი იმის გამო, რომ მხარი არ დაუჭირა მის ქვეყანას აზერბაიჯანის აგრესიისას. ერევანი ასევე შეუერთდა სისხლის სამართლის საერთაშორისო სასამართლოს (ICC) მოსკოვის სურვილის საწინააღმდეგოდ. ამ გადაწყვეტილების შემდეგ, ერევანი ვალდებულია დააპატიმროს რუსეთის პრეზიდენტი ვლადიმერ პუტინი, თუ ის სომხეთში ჩავა. სომხეთი და აზერბაიჯანი ცდილობენ მოლაპარაკებას უფრო ფართო სამშვიდობო შეთანხმების გარშემო. ხშირია შეტაკებები ორი ქვეყნის საზღვრისპირა ჯარებს შორის. ასევე ნახეთ ნიკოლ ფაშინიანის თქმით, დაიწყო სომხეთ-აზერბაიჯანის საზღვრების დელიმიტაცია-დემარკაციის პროცესი ...