საქართველოს პარლამენტში "აგენტების კანონის" პირველი მოსმენით მიღების შემდეგ საქართველოს პრეზიდენტმა, სალომე ზურაბიშვილმა BBC-სთან ინტერვიუში ისაუბრა ამ კანონის შესახებ. სალომე ზურაბიშვილმა თქვა, რომ კანონის მიღების შემთხვევაში გამოიყენებს მის წინააღმდეგ ვეტოს დადების უფლებას იმის მიუხედავად, რომ "მმართველ პარტიას" აქვს ვეტოს დაძლევის შესაძლებლობა. პრეზიდენტის განმარტებით მისი ვეტო იქნება ხალხის ხმისა და სურვილის გამოხატულება, რომელიც მტკიცედ ეწინააღმდეგება მასიური, მშვიდობიანი პროტესტით "აგენტების კანონს." "მთავარ შეშფოთებას იწვევს ის, რომ ეს კანონი არის პუტინის კანონის ასლი. ეს არის კანონი არასამთავრობო სექტორის, მედიის, პარტნიორი ქვეყნების საერთაშორისო ორგანიზაციების წინააღმდეგ, იქნება ეს ევროპული ქვეყნები, დიდი ბრიტანეთი თუ ამერიკის შეერთებული შტატები, რომლებიც ეხმარებიან საქართველოს დამოუკიდებელი სახელმწიფო ინსტიტუციების მშენებლობაში, ეკონომიკის გაძლიერებაში ბოლო 30 წლის განმავლობაში. ძალიან დიდ შეშფოთებას იწვევს ისიც, რომ გასულ წელს ეს კანონი უკან იქნა წაღებული მასობრივი პროტესტის ფონზე და წელს ამ კანონის უკან დაბრუნება პირდაპირი პროვოკაციაა საზოგადოების მიმართ" - თქვა სალომე ზურაბიშვილმა ჟურნალისტის კითხვის პასუხად, რატომ მიიჩნევს ამ კანონს მიუღებლად. საქართველოს პრეზიდენტს BBC-მ კითხა გამჭვირვალობის შესახებაც, საქართველოს მთავრობა სწორედ მეტი გამჭვირვალობის საჭიროებით ხსნის საზოგადოების მიერ "რუსულ კანონად" მიჩნეული კანონის მიღების აუცილებლობას. "საერთაშორისო ორგანიზაციები ისედაც გამჭვირვალეა, რაც არ არის გამჭვირავლე, არის ელიტური კორუფცია სახელმწიფო უწყებებში და გადაწყვეტილებები, რომლებიც მიიღება ხელისუფლების მიერ, როგორც მაგალითად ეს გადაწყვეტილება იმ კანონის უკან დაბრუნების შესახებ, რომელზეც ყველა საერთაშირისო პარტნიორი გვეუბნება, რომ ჩვენი ევროპული მომავლის და ინტეგრაციის საწინააღმდეგოდ იმუშავებს. ვინ გადაწყვიტა ამ კანონის უკან დაბრუნება? ეს არის ქვეყნის შიგნით მიღებული გადაწყვეტილება თუ გადაწყვეტილება, რომელიც მოსკოვში იქნა მიღებული? ეს არის მთავარი კითხვა გამჭვირვალობის შესახებ, რომელსაც სვამენ ამ დღეებში საქართველოს ის მოქალაქეები, ისინი ვინც მასიურ მშვიდობიან პროტესტში მონაწილეობენ [ამ კანონის წინააღმდეგ];" - თქვა სალომე ზურაბიშვილმა. ასევე ნახეთ სია: ვინ დაუჭირა „აგენტების კანონს“ მხარი პირველი მოსმენით BBC-სთან ინტერვიუმდე საქართველოს პრეზიდენტმა შეხვედრა გამართა საქართველოში აკრედიტებული დიპლომატიური მისიების წარმომადგენლებთან. პრეზიდენტის ადმინისტრაციის მიერ ამ შეხვედრის შესახებ გავრცელებულ ინფორმაციაში წერია, რომ სალომე ზურაბიშვილმა "ყურადღება გაამახვ...