თბილისში, მთავრობის ადმინისტრაციის შენობასთან, სადაც „აგენტების კანონის“ საწინააღმდეგო აქცია იმართება, პოლიციამ ოპოზიციონერი დეპუტატი ალეკო ელისაშვილი ავტომანქანით გაიყვანა. ვიდეოკადრები, რომლებშიც ჩანს, როგორ სვამენ ძალის გამოყენებით პოლიტიკოსს მანქანაში, „მთავარმა არხმა“ გაავრცელა. მანამდე რამდენიმე წუთით ადრე, ალეკო ელისაშვილი პრემიერ-მინისტრ ირაკლი კობახიძესთან შეხვედრას ითხოვდა და პოლიციასთან დაპირისპირება მოუხდა. renderExternalContent("https://www.youtube.com/embed/DXn-UbAXpes?&&&fs=1&enablejsapi=1") საქართველოს კანონმდებლობით, პოლიციას არ შეუძლია პარლამენტის მოქმედი დეპუტატის დაკავება. როგორც წესი, ასეთ დროს შსს-ს თანამშრომლები ადგილს არიდებენ აქციის აქტიური მონაწილეს, რომლის დაკავებაც არ შეუძლიათ. ტელევიზიების გავრცელებულ კადრებში ჩანს, რომ პოლიციამ აქციის სხვა მონაწილეები დააკავა. შინაგან საქმეთა სამინისტროს პრესსამსახურის ინფორმაციით, ადმინისტრაციული წესით დაკავებულია აქციის ორი მონაწილე. ამავე განცხადების მიხედვით, ერთ-ერთ მათგანს ცივი იარაღი ჰქონდა. „მოვუწოდებთ აქციის ყველა მონაწილეს, არ გასცდნენ შეკრების და გამოხატვის თავისუფლების კანონით დასაშვებ ფარგლებს, დაიცვან საზოგადოებრივი წესრიგის ნორმები და დაემორჩილონ პოლიციელთა კანონიერ მითითებებს“, - წერია შსს-ს განცხადებაში. ე.წ. აგენტების კანონპროექტი პარლამენტმა პირველი მოსმენით 17 აპრილს მიიღო. კანონის წინააღმდეგ აქცია თბილისში 19:00 საათზე დაიწყო. მოგვიანებით აქციის მონაწილეებმა მთავრობის ადმინისტრაციასთან გადაინაცვლეს, პოლიტიკურმა ლიდერებმა კი პრემიერ-მინისტრ ირაკლი კობახიძესთან შეხვედრა მოითხოვეს. აქციის მონაწილეთა მთავარი მოთხოვნაა, „ქართულმა ოცნებამ“, გასული წლის მსგავსად, გაიწვიოს ე.წ. აგენტების კანონი. საქართველოს პარტნიორი ქვეყნებისა და ორგანიზაციების შეფასებით, ეს კანონი ხელს შეუშლის ქვეყნის ევროინტეგრაციას, მმართველი პარტია კი ამტკიცებს, რომ ის ევროპულია. ასევე ნახეთ სია: ვინ დაუჭირა „აგენტების კანონს“ მხარი პირველი მოსმენით 2023 წლის მარტში ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. „ქართულმა ოცნებამ“ კანონპროექტი 2024 წლის 3 აპრილს დააბრუნა პარლამენტში. ტერმინი „უცხოური გავლენის აგენტი“ პროექტში მან "უცხო ძალის ინტერესების გამტარებელი ორგანიზაციით" ჩაანაცვლა. ...