„აგენტების კანონის“ წინააღმდეგ საპროტესტო აქციების მესამე დღე სრულდება. 17 აპრილს, 19:00 საათზე დაწყებული მრავალრიცხოვანი დემონსტრაცია, რომელიც პარლამენტთან დაიწყო და ნაწილობრივ მთავრობის ადმინისტრაციასთან გადაინაცვლა, დაახლოებით ცხრა საათში, 18 აპრილს, ღამის სამი საათისთვის, საგრძნობლად შეთხელებულია. პარლამენტთან და მთავრობის ადმინისტრაციასთან ამჟამად ათეულობით ადამიანიღა რჩება. მთავრობის ადმინისტრაციასთან პოლიციელების ნაწილი კვლავ მობილიზებულია. დემონსტრაციის სპიკერებს არ გამოუცხადებიათ, რა გეგმებით აქვთ მომდევნო დღეებში. პარტია „ახლის“ ერთ-ერთმა ლიდერმა ნიკა მელიამ ჟურნალისტებს განუცხადა, რომ პროტესტი არ შეჩერდება: „სამოქმედო გეგმა არის ის, რომ დასრულდება პროცესი სიმშვიდით, სიმტკიცით და სახელმწიფოს გამარჯვებით. ივანიშვილი ქვეყანას საგარეო პოლიტიკურ კურსს ვერ შეუცვლის“, - თქვა მან. დემონსტრანტების მცირე ნაწილი ინგოროყვას ქუჩაზე, მთავრობის ადმინისტრაციასთან, ამ დრომდე [03:45] რჩება. ე.წ. აგენტების კანონის წინააღმდეგ აქცია თბილისში 19:00 საათზე დაიწყო. აქციის მონაწილეებმა ხელისუფლებას 22:30 საათამდე მისცეს ვადა კანონპროექტის გასაწვევად. მოგვიანებით, დაახლოებით 23:00 საათისთვის, დემონსტრანტების ნაწილი მთავრობის ადმინისტრაციასთან წავიდა. პოლიტიკურმა ლიდერებმა პრემიერ-მინისტრ ირაკლი კობახიძესთან შეხვედრა მოითხოვეს. პარტია „ახლის“ ლიდერი ნიკა გვარამია მთავრობის ადმინისტრაციასთან კობახიძე მათ არ შეხვედრია. ამის შემდეგ აქცია ორ ადგილას გაგრძელდა - პარლამენტთანაც და მთავრობის ადმინისტრაციასთანაც. აქციაზე ორი ადამიანი დააკავეს - შსს-ის თანახმად, „პროტესტის გამომხატველთა მხრიდან არაერთხელ განხორციელდა ძალადობრივი ქმედებები“. მთავრობის ადმინისტრაციის შენობასთან, სადაც „აგენტების კანონის“ საწინააღმდეგო აქცია იმართება, დაახლოებით 00:00 საათისთვის პოლიციამ ოპოზიციონერი დეპუტატი ალეკო ელისაშვილი ავტომანქანით, ძალის გამოყენებით გაიყვანა ტერიტორიიდან. სახალხო დამცველის ცნობით, ელისაშვილი „თავს ნორმალურად გრძნობს“. ასევე ნახეთ თავს ნორმალურად გრძნობს - სახალხო დამცველი ალეკო ელისაშვილზე, რომელიც პოლიციამ წაიყვანა მრავალრიცხოვანი საპროტესტო აქციები „აგენტების კანონის“ ხელახლა ინიციირებას მოჰყვა პარლამენტში. 2023 წლის მარტში ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. „ქართულმა ოცნებამ“ კანონპროექტი 2024 წლის 3 აპრილს დააბრუნა პარლამენტში. 17 აპრილს პარლამენტმა კანონი პირველი მოსმენით მიიღო. ტერმინი „უცხოური გავლენის აგენტი“ შარშანდელ პროექტში „უცხო ძალის ინტერესების გამტარებელი ორგანიზაციით“...