„აგენტების კანონის“ მოწინააღმდეგეები გრძელვადიანი პროტესტისთვის ემზადებიან და სამოქმედო გეგმაზე მუშაობენ. „კი ევროპას, არა რუსულ კანონს“ - ამ სახელწოდებით ცნობილი საპროტესტო კამპანიის ორგანიზატორები რადიო თავისუფლებას ეუბნებიან, რომ საქართველოს პარლამენტთან დღეს აქცია არ გაიმართება. მათი გეგმით, პროტესტი "აგენტების კანონის" განხილვების პარალელურად გაგრძელდება. „აღმოსავლეთ ევროპის მრავალპარტიული დემოკრატიის ცენტრის“ აღმასრულებელი დირექტორის, ლევან ცუცქირიძის თქმით, უახლოესი აქციის ზუსტი თარიღი ჯერ დაზუსტებული არ არის. მხოლოდ ისაა გადაწყვეტილი, რომ კანონის მეორედ მოსმენა პროტესტის ფონზე ჩაივლის. „დღეს კონკრეტულად აქციას არ ვგეგმავთ და არც ვაანონსებთ. მიგვაჩნია, რომ კიდევ ბევრი მნიშვნელოვანი ეტაპია, ჩვენ არ გვქონდა იმის ილუზია, რომ ერთი შეკრებით გადაწყდებოდა ეს საკითხი. წინ ბევრი საეტაპო მოვლენაა, იქნება ეს განხილვა კენჭისყრა, შეხვედრა თუ დისკუსია, რომლისთვისაც უნდა მოვემზადოთ. ყველა ამ გეგმაზე საჯაროდ ვისაუბრებთ", - ამბობს ლევან ცუცქირიძე. ე.წ. აგენტების კანონი მეორე მოსმენით ჯერ იურიდიულ კომიტეტზე გავა, შემდეგ კი სესიაზე. საკომიტეტო მოსმენა, სავარაუდოდ, მომდევნო კვირას გაიმართება. სასესიო განხილვა კი ორ კვირაში. „ჩვენ თავიდანვე ვთქვით, რომ ეს პროტესტი არ იქნება ერთდღიანი და ორდღიანი, ჩვენ მივყვებით პროცესებს, და შემდეგ მოსმენაზე ისევ შევიკრიბებით. ხელისუფლება ეცდება, რომ დაღალოს ხალხი და ნიჰილიზმში ჩააგდოს, აქედან გამომდინარე ჩვენ მრავალფეროვან აქციებს შევთავაზებთ“, - ამბობს რეფორმებისა და კვლევის ჯგუფის წევრი საბა სხვიტარიძე. აქციის ორგანიზატორების გეგმაა, რომ საპროტესტო მუხტი რეგიონებშიც გავრცელდეს გაგრძელდება საინფორმაციო კამპანიებიც. „გვაქვს ხედვა, როგორ არ უნდა დავუშვათ ამ კანონის მიღება და გვაქვს ჩვენი გეგმები. ამ გეგმებს გავაცნობთ ყველას საჯაროდ. საეტაპო მოვლენებს კი ვუპასუხებთ თამამად, მთავრობის ნაბიჯი იქნება, განცხადება თუ განხილვები", - ამბობს რადიო თავისუფლებასთან ლევან ცუცქირიძე. 18 აპრილს, საღამოს შვიდ საათზე აქცია დააანონსა ახალგაზრდულმა მოძრაობამ „დაფიონი“. მოძრაობის წევრები ფიქრობენ, რომ პროტესტი არ უნდა შეწყდეს. „არ არის დრო მეორე და მესამე მოსმენის დალოდების, კანონი უნდა ჩავარდეს ახლავე“, - ვკითხულობთ აქციის საანონსო ტექსტში. პროცედურის თანახმად, პარლამენტი კანონპროექტს განიხილავს და კენჭს უყრის სამი მოსმენით: კანონპროექტის პირველი მოსმენისას განიხილეს მისი ზოგადი პრინციპები და ძირითადი დებულებები; მეორე მოსმენისას კანონპროექტი განიხილება მუხლების მიხედვით; მესამე მოსმენისას შეიძლება, კანონპროექტში შევიდეს რედაქციული შენიშვნები. აგენტების კანონი პირველი მოსმენით 17 აპრილს დაამტკიცეს. კანონპროექტს მხარი დაუჭირა 83-მა...