"ჩვენ უკიდურესად იმედგაცრუებული ვართ საქართველოს პარლამენტის გადაწყვეტილებით, წინ წაწიოს კრემლისგან შთაგონებული „უცხოური გავლენის“ კანონმდებლობა", - წერია სახელმწიფო დეპარტამენტის პრესსპიკერის, მეთიუ მილერის განცხადებაში. მისი სიტყვებით, ისინი იზიარებენ ევროპელი მოკავშირეების პოზიციას, რომ ამ კანონის მიღებამ შეიძლება დააზიანოს საქართველოს პროგრესი ევროკავშირის გზაზე. "საქართველოს ჰყავს აქტიური სამოქალაქო საზოგადოება, რომელიც საკუთარ მოქალაქეებს ემსახურება და მუშაობს საქართველოს ეკონომიკის გასაუმჯობესებლად. შემოთავაზებული კანონის მიღებამ შეიძლება, შეზღუდოს გამოხატვის თავისუფლება, სტიგმატიზირება მოახდინოს ორგანიზაციების, რომლებიც საქართველოს მოქალაქეებს ეხმარებიან და შეაფერხოს დამოუკიდებელი მედიაორგანიზაციები, რომლებიც მუშაობენ ქართველებისთვის მაღალი ხარისხის ინფორმაციის ხელმისაწვდომობაზე. კრემლის მიერ შთაგონებული ამგვარი კანონმდებლობა არ არის მიზანშეწონილი, თუ მიზანი გამჭვირვალობის ხელშეწყობაა", - წერია განცხადებაში, რომელშიც სახელმწიფო დეპარტამენტი ყველა მხარეს მოუწოდებს, დაიცვან მშვიდობიანი შეკრების უფლება. "აგენტების კანონი" პირველი მოსმენით 17 აპრილს დაამტკიცეს. კანონპროექტს მხარი დაუჭირა 83-მა დეპუტატმა, მათ შორის 73-მა - „ქართული ოცნებიდან“, ცხრამ - "ხალხის ძალიდან“ და ერთმა - "ევროპელი სოციალისტებიდან“. ასევე ნახეთ სია: ვინ დაუჭირა „აგენტების კანონს“ მხარი პირველი მოსმენით კანონპროექტის პირველი მოსმენით დამტკიცება 17 აპრილს, საღამოს შვიდ საათზე მოქალაქეებმა საქართველოს პარლამენტთან გააპროტესტეს. მოეწყო მსვლელობა მთავრობის ადმინისტრაციისკენაც. მთავრობის ადმინისტრაციასთან აქციაზე შსს-მ ორი ადამიანი დააკავა. ეს რიგით მესამე აქცია იყო „აგენტების კანონის“ წინააღმდეგ. პირველი მასშტაბური პროტესტი პარლამენტთან იმ დროს გაიმართა, როცა აგენტების კანონს პარლამენტის იურიდიულ საკითხთა კომიტეტის სხდომაზე პირველი მოსმენით განიხილავდნენ. 16 აპრილის აქციაზე სპეცდანიშნულების რაზმი დემონსტრანტებს და ჟურნალისტებს ფიზიკურად გაუსწორდა. როგორც აქციის მონაწილეებმა თქვეს, მათი დაშლა მოულოდნელად დაიწყო და სპეცრაზმელებმა აქციის მონაწილეებს კონდახებით სცემეს. შინაგან საქმეთა სამინისტროს პრესცენტრში რადიო თავისუფლებას უთხრეს, რომ თბილისში 16-17 აპრილს გამართულ აქციაზე 18 პირი ადმინისტრაციული წესით დააკავეს. ასევე ნახეთ ექვსი ოპოზიციური პარტიის განცხადება: მთავარი ბრძოლა ჯერ კიდევ წინაა ...