საქართველოს პარლამენტი, "უსაფრთხო გარემოს უზრუნველყოფის" მიზეზით, 19 აპრილის პლენარულ სხდომაზეც არ დაუშვებს ონლაინმედიის წარმომადგენლებს. შესაბამისი განცხადება საკანონმდებლო ორგანოს პრესსამსახურმა გაავრცელა. განცხადების თანახმად, ხვალინდელ სხდომაზე პარლამენტის სასახლეში იმოქმედებს უსაფრთხოების ყვითელი დონე, რაც იმას ნიშნავს, რომ ვიზიტორებს შეეზღუდებათ შენობაში შესვლა. "შეზღუდვა არ შეეხება ტელემაუწყებლების/ტელემედია საშუალებების აკრედიტებულ ჟურნალისტებს", - წერია განცხადებაში. შეზღუდვის დასაწესებლად, პარლამენტის თავმჯდომარეს, შალვა პაპუაშვილს, ცალკე სამართლებრივი აქტი არ გამოუცია - ის ხელმძღვანელობს 2023 წლის სექტემბერში გამოცემული ბრძანებით, რომლითაც ჟურნალისტებს მუშაობის წესს უდგენს. სპიკერის გადაწყვეტილებით, 19 აპრილს დაგეგმილ საპარლამენტო ღონისძიებებზე, მათ შორის კომიტეტის სხდომებზე, დაიშვებიან მხოლოდ შესაბამისი სტრუქტურული ერთეულების მიერ მოწვეული პირები. 19 აპრილს საგაზაფხულო სესიის პლენარული სხდომა 12:00 საათზეა დანიშნული. იმავე „უსაფრთხოების“ მიზეზით, ონლაინ და ბეჭდური მედიის ჟურნალისტებს პარლამენტში მუშაობის უფლება არ ეძლევათ 15 აპრილიდან, მას შემდეგ, რაც „რუსულ კანონად“ წოდებული „აგენტების კანონი" განსახილველად დაბრუნდა საკანონმდებლო ორგანოში. პარლამენტში არ დაუშვეს რადიო თავისუფლების აკრედიტებული ჟურნალისტიც. ასევე ნახეთ ონლაინმედია პარლამენტში არ შეუშვეს. „ტყუილია“ - ამბობს ოხანაშვილი "აგენტების კანონი" პირველი მოსმენით 17 აპრილს დაამტკიცეს. კანონპროექტს მხარი დაუჭირა 83-მა დეპუტატმა, მათ შორის 73-მა - „ქართული ოცნებიდან“, ცხრამ - "ხალხის ძალიდან“ და ერთმა - "ევროპელი სოციალისტებიდან“. კანონპროექტის პირველი მოსმენით დამტკიცება 17 აპრილს, 19 საათიდან, მოქალაქეებმა საქართველოს პარლამენტთან გააპროტესტეს. მოეწყო მსვლელობა მთავრობის ადმინისტრაციისკენაც. მთავრობის ადმინისტრაციასთან აქციაზე შსს-მ ორი ადამიანი დააკავა. 16 აპრილის აქციაზე სპეცდანიშნულების რაზმი დემონსტრანტებს და ჟურნალისტებს ფიზიკურად გაუსწორდა. როგორც აქციის მონაწილეებმა თქვეს, მათი დაშლა მოულოდნელად დაიწყო და სპეცრაზმელებმა აქციის მონაწილეებს კონდახებით სცემეს. შინაგან საქმეთა სამინისტროს პრესცენტრში რადიო თავისუფლებას უთხრეს, რომ თბილისში 16-17 აპრილს გამართულ აქციაზე 18 პირი ადმინისტრაციული წესით დააკავეს. ...