პოლონეთის პრემიერ-მინისტრმა დონალდ ტუსკმა პოლონელ ფერმერებს მოუწოდა, შეწყვიტონ უკრაინასთან საზღვრის ბლოკირება. 18 აპრილს, ბრიუსელში ევროპის საბჭოს სამიტის შემდეგ, ტუსკმა ხაზი გაუსვა იმ რთულ ვითარებას, რომელშიც უკრაინა ბოლო დღეებში აღმოჩნდა რუსეთის თავდასხმების შემდეგ და მოუწოდა პოლონეთის ყველა მოქალაქეს, რომ არ „გააკეთონ ისეთი რამ, რამაც შეიძლება ზიანი მიაყენოს უკრაინას." ტუსკმა ხაზი გაუსვა, რომ მიუხედავად იმ მიზეზებისა, რითაც გამოწვეულია ფერმერთა პროტესტი, პოლონეთის ხელისუფლება ვერ დაუშვებს სასაზღვრო გადასასვლელების გადაკეტვას. 18 აპრილის დილით, პოლონელმა ფერმერებმა კვლავ გადაკეტეს უკრაინის საზღვართან მდებარე კორჩევა-კრაკოვეცისა და მედიკა-შეგინის გამშვები პუნქტები. ამის შესახებ რადიო თავისუფლებას აქციის ერთ-ერთმა ორგანიზატორმა, „მოტყუებულ აგრარიკოსთა“ ლიდერმა რომან კონდრუვმა განუცხადა. ასევე ნახეთ პოლონელმა ფერმერებმა განაახლეს უკრაინასთან დამაკავშირებელი ორი საბაჟო პუნქტის ბლოკირება პოლონელი ფერმერები თებერვლიდან მოითხოვენ უკრაინიდან სასოფლო-სამეურნეო პროდუქციის იმპორტის აკრძალვას. ისინი ასევე ეწინააღმდეგებიან ევროპის აგრარულ პოლიტიკას, კერძოდ, ილაშქრებენ "მწვანე სისტემის" დანერგვის წინააღმდეგ. საუბარია მთელ რიგ გარემოსდაცვით პრობლემებსა და კლიმატურ მოთხოვნებზე. მოთხოვნებს შორისაა ასევე მეცხოველეობის მხარდაჭერა. "ჩვენ არანაირად არ შეგვიძლია ზიანი მივაყენოთ უკრაინას იმ სიტუაციაში, როდესაც ომის ბედი წყდება“, - აღნიშნა ტუსკმა და დასძინა, რომ მთავრობა შეიძლება იძულებული გახდეს, მიიღოს პოლონეთის სასაზღვრო და საბაჟო გადასასვლელების დაცვის გადაწყვეტილება. თავის მხრივ, ფერმერები ცდილობენ პრემიერ-მინისტრ დონალდ ტუსკთან შეხვედრას, რათა მისგან მოისმინონ, თუ კონკრეტულად რას აკეთებს მთავრობა ფერმერთა პრობლემების მოსაგვარებლად. ...