„ეს თემა ასაწევია, როგორ იყენებენ ფეხბურთელებს, თან ძებნილი [დავით] კეზერაშვილი აკეთებს კომენტარს, მეტი ლუსტრაცია რაღა გინდა?!“, - ეწერა 10:04 საათზე ნინო შუბლაძის WhatsApp-ში გამოქვეყნებულ „სთორიში“, რომელიც დაახლოებით 15-20 წუთის განმავლობაში იძებნებოდა, შემდეგ კი წაიშალა. მის სტატუსში საუბარი იყო, სავარაუდოდ, „გარდიანში“ 17 აპრილს გამოქვეყნებულ მასალაზე, რომელიც „აგენტების კანონის“ შესახებ ფეხბურთელების საწინააღმდეგო განცხადებებს შეეხებოდა. ამავე მასალაში იყო ნახსენები ყოფილი თავდაცვის მინისტრი დავით კეზერაშვილიც, რომელზეც საქართველოს ძებნა აქვს გამოცხადებული. ჟურნალისტი რადიო თავისუფლებას უყვება, რომ დღეს დილით ის მეგობრის სატელეფონო ზარმა გააღვიძა, რომელმაც უთხრა, რომ „უცნაური სთორი“ გამოაქვეყნა. „შევვარდი „ფეისბუკში“, მერე „ინსტაგრამზე“ შევამოწმე, წარმოდგენა არ მქონდა, რომ „უოტსაფს“ სთორი ჰქონდა... მე აღარ ვაქცევ ყურადღებას, მედიაში იმდენი რამ ვრცელდება დისკრედიტაციისთვის. ვმუშაობ და ვცდილობ, ჟურნალისტურ სტანდარტებს არ გავცდე, ესაა ჩემი სათქმელი. „სკრინები“ სადაც უნდა, ატარონ“, - ამბობს ნინო შუბლაძე. მისი თქმით, ეს სტატუსი მას არ დაუწერია და მის მოწყობილობაში სხვა ადამიანმა შეაღწია. „მე როცა შევედი, აღარ დამხვდა სთორი“, - დასძენს ის. ჟურნალისტს საგამოძიებო უწყებისთვის ჯერ არ მიუმართავს. რადიო თავისუფლება შინაგან საქმეთა სამინისტროს პრესსამსახურიდან ელოდება პასუხს, დაიწყო თუ არა საჯაროდ გავრცელებული ინფორმაციის საფუძველზე გამოძიება. „გარდიანში“ გამოქვეყნებულ სტატიაზე მასალა ტელეკომპანია „იმედმა“ ეთერში 11-საათიან საინფორმაციო გამოშვებაში გაუშვა, „რუსთავი 2“-ს კი, სთორის გამოქვეყნების შემდეგ, პირველი საინფორმაციო გამოშვება 12:00 საათზე ჰქონდა, სადაც ეს საკითხი არ გაშუქებულა. საკითხი არ გაშუქებულა არც „იმედის“ მომდევნო გამოშვებებში. ...