აშშ-ის კონგრესის წარმომადგენელთა პალატამ მრავალთვიანი დისკუსიების შემდეგ დაამტკიცა უკრაინისთვის დახმარების გამოყოფა. ეს ნაწილია უფრო ფართო პაკეტისა, რომელიც ასევე ითვალისწინებს დახმარებას ვაშინგტონის სხვა მოკავშირეებისთვისაც, მათ შორის ისრაელისთვის და ტაივანისთვის. მთლიანობაში პაკეტი მოიცავს 95,3 მილიარდ დოლარს, რაც შეესაბამება იმ თანხას, რომელიც აშშ-ის სენატმა თებერვალმა დაამტკიცა. მაგრამ წარმომადგენელთა პალატის პაკეტში რამდენიმე განსხვავებაა სენატის დოკუმენტთან შედარებით. მიმომხილველთა აზრით, ამ განსხვავებების მიზანი იყო, დაეშოშმინებინა წარმომადგენელთა პალატის კონსერვატორები. დოკუმენტის თანახმად, უკრაინა მიიღებს 60,84 მილიარდ დოლარს. როგორც Politico იტყობინება აშშ-ის მაღალი რანგის მოხელეებზე დაყრდნობით, პენტაგონი ემზადება, სწრაფად დაამტკიცოს უკრაინისთვის უკიდურესად აუცილებელი იარაღის სია, მათ შორის საარტილერიო ჭურვები და საჰაერო თავდაცვის საშუალებები. საგარეო საქმეთა სამინისტრო საამისოდ ელოდებოდა დახმარების კანონპროექტის დამტკიცებას. კიევი სულ უფრო მზარდ ზეწოლას განიცდის რუსეთის მხრიდან. მაშინ, როცა უკრაინა აშშ-ის დახმარების მოლოდინშია, რუსეთის უკეთესად შეიარაღებულ და უფრო მრავალრიცხოვან ჯარებს ამან უპირატესობა მიანიჭა ბრძოლის ველზე. ასევე ნახეთ 50 მილიარდი ევრო რეფორმებისთვის - როდის და რა დახმარებას მიიღებს უკრაინა ევროკავშირისგან? უკრაინის პრეზიდენტი ვოლოდიმირ ზელენსკი და მისი მთავრობა უკვე რამდენიმე თვეა ეხვეწებიან დასავლელ მოკავშირეებს, გაზარდონ საჰაერო თავდაცვის სისტემების, შეიარაღებისა და საარტილერიო ჭურვების მიწოდება. წარმომადგენელთა პალატის მიერ 20 აპრილს დამტკიცებული პაკეტი განიხილება როგორც უმნიშვნელოვანესი მაშველი რგოლი უკრაინის გადასარჩენად რუსეთის აგრესიის პირობებში. უკრაინის დახმარების პაკეტი შეიცავს 23,2 მილიარდ დოლარს აშშ-ის მარაგების შესავსებად და 11,3 მილიარდ დოლარს აშშ-ის ჯარებისთვის იმ რეგიონში, სადაც წვრთნას გადიან უკრაინის ჯარები. ისევე, როგორც სენატში მიღებული კანონპროექტი, წარმომადგენელთა პალატის დოკუმენტიც შეიცავს 13,8 მილიარდ დოლარს შეიარაღების მოწინავე სისტემების შესაძენად, მაგრამ წარმომადგენელთა პალატის კანონპროექტში ასევე შედის 9 მილიარდ დოლარზე მეტი უკრაინის ეკონომიკური დახმარებისთვის „ისეთი კრედიტებისთვის, რომელთა პატიება შეიძლება“. თეთრ სახლს უფლება ექნება, დაადგინოს კიევისთვის სესხების გაცემის პირობები, ასევე გაქვითოს ისინი. ასევე ნახეთ ნატოს ქვეყნები უკრაინისათვის მეტი საჰაერო თავდაცვის სისტემის გადაცემაზე შეთანხმდნენ გათვალისწინებულია ასევე 26 მილიონი დოლარის გამოყოფა, რაც მოხმარდება „მეთვალყურეობასა და ანგარიშგებას“ დახმარებისთვის, რომელიც უკრაინას გამოეყოფა. წარმომადგენელთა პალა...