უკრაინის პრეზიდენტმა ვოლოდიმირ ზელენსკიმ განაცხადა, რომ ის რუსეთის წინააღმდეგ უკრაინის „გამარჯვების შანსს“ ხედავს მას შემდეგ, რაც შეერთებული შტატების კონგრესის წარმომადგენელთა პალატამ მიიღო კანონპროექტი, რომელიც კრიტიკულად მნიშვნელოვანია უკრაინის თავდაცვისთვის. „ვფიქრობ, ეს დახმარება მართლაც გააძლიერებს უკრაინის შეიარაღებულ ძალებს“, - თქვა ზელენსკიმ 21 აპრილს NBC-სთან ინტერვიუში. „და ჩვენ გამარჯვების შანსი გვექნება, თუკი უკრაინა მართლაც მიიღებს შეიარაღების სისტემას, რომელიც ასე ძალიან გვჭირდება“. ასევე ნახეთ აშშ-ის წარმომადგენელთა პალატამ უკრაინის დახმარების პაკეტი დაამტკიცა კიევი პრიორიტეტულ მნიშვნელობას ანიჭებს შორი რადიუსის შეიარაღებას და საჰაერო თავდაცვის სისტემებს, რომლებიც, ზელენსკის თქმით, უკრაინას საშუალებას მისცემს, „ჩაშალოს რუსეთის გეგმები“ და არ მისცეს მას მოსალოდნელი სრულმასშტაბიანი იერიშის წარმოების საშუალება. სოცქსელ X-ში ზელენსკიმ დაწერა, რომ დემოკრატიულ მსოფლიოს შესწევს იმის ძალა, რომ დაამარცხოს რუსეთი და მას „არ უნდა ეშინოდეს საკუთარი ძალის“. უკრაინის პრეზიდენტმა კონკრეტულად იგულისხმა საჰაერო თავდაცვის სისტემა Patriot-ი და საბრძოლო თვითმფრინავები. შესაძლოა კვირები დასჭირდეს ამ შეიარაღების ფრონტამდე მიტანას, მაშინ როცა ამუნიციის ნაკლებობა უკრაინის შეიარაღებულ ძალებს აიძულებს, ეკონომიურად გამოიყენონ საბრძოლო მასალა. აშშ-ის წარმომადგენელთა პალატამ 20 აპრილს მიიღო 95 მილიარდი დოლარის დახმარების პაკეტი, რომელშიც ყველაზე დიდი წილი, 61 მილიარდი დოლარი, უკრაინისთვის არის განკუთვნილი. დახმარებას მიიღებენ ასევე ისრაელი და აშშ-ის სხვა მოკავშირეები. ...