დემოკრატი სენატორი მარკ უორნერი ვარაუდობს, რომ უკრაინისთვის 61 მლრდ დოლარის სამხედრო დახმარების შესახებ კანონის დამტკიცებისა და პრეზიდენტ ჯო ბაიდენის ხელმოწერის შემდეგ, აშშ-ის სამხედრო დახმარების პირველი ნაკადი, მათ შორის ოპერატიულ ტაქტიკური რაკეტა ATACMS-ები, შესაძლოა, უკრაინაში მომდევნო კვირაში გაიგზავნოს. „იმედი მაქვს, რომ მას შემდეგ, რაც ის [კანონი] პრეზიდენტთან მოხვდება სამშაბათს ან ოთხშაბათს, ეს ნაკადი ჩაეშვება შორი მოქმედების რაკეტებთან, ATACMS-ებთან [ერთად], მე იმედი მაქვს, როდესაც მას პრეზიდენტი მოაწერს ხელს. ეს ტვირთები კვირის ბოლოსთვის უკვე გზაში იქნება“, - უთხრა სენატორმა უორნერმა ტელეკომპანია CBS-ს. სენატორმა ჟურნალისტის კითხვის პასუხად დაადასტურა, რომ საუბრობდა სწორედ შორი მოქმედების რაკეტა ATACMS-ებზე და რომ ეს კანონში წერია. გასულ კვირას ამერიკული მედია წერდა, რომ უკრაინის სამხედრო დახმარების მოზრდილი პაკეტი პენტაგონმა წინასწარ მოამზადა, შესაბამისად ასიგნებების დამტკიცების შემდეგ, უკრაინის არმიისთვის იარაღისა და საბრძოლო მასალის მიწოდებას კვირაზე ნაკლები დასჭირდება. ასევე ნახეთ ATACAMS-ი უკრაინაში - რას შეცვლის ფრონტზე ეს რაკეტები? ATACMS-ი 300 კმ დისტანციის ტაქტიკური ბალისტიკური რაკეტაა, რომელიც მრავალჯერადი სარაკეტო სისტემა HIMARS-იდან ეშვება. გასულ შემოდგომაზე შეერთებულმა შტატებმა უკრაინას ამ რაკეტების ძველი მოდიფიკაციის (160 კმ რადიუსის) რაკეტების საცდელი პარტია გადასცა. იმის შესახებ, რომ აშშ უკრაინისთვის რაკეტების ახალი პარტიის გადაცემას აპირებდა, მედიაში ბოლო თვეებში არაერთხელ გახმაურდა. ასევე ნახეთ აშშ-ის წარმომადგენელთა პალატამ უკრაინის დახმარების პაკეტი დაამტკიცა აშშ-ის კონგრესის წარმომადგენელთა პალატამ მრავალთვიანი დისკუსიების შემდეგ, 21 აპრილს, დაამტკიცა უკრაინისთვის დახმარების გამოყოფა. ეს ნაწილია უფრო ფართო პაკეტისა, რომელიც ასევე ითვალისწინებს დახმარებას ვაშინგტონის სხვა მოკავშირეებისთვისაც, მათ შორის ისრაელისა და ტაივანისთვის. დოკუმენტის თანახმად, უკრაინა მიიღებს 60,84 მილიარდ დოლარს. კანონის მიღების შემდეგ უკრაინის პრეზიდენტმა ვოლოდიმირ ზელენსკიმ განაცხადა, რომ ის რუსეთის წინააღმდეგ უკრაინის „გამარჯვების შანსს“ ხედავს. ასევე ნახეთ ზელენსკი: კონგრესში სამხედრო დახმარების საკითხში გარღვევა უკრაინას გამარჯვების შანსს აძლევს ...