საქართველოში ყველაზე გრძელი, ​ქვეშეთი-კობის გვირაბის გაჭრა დასრულდა. მისი სიგრძე ცხრა კილომეტრი, დიამეტრი კი 15 მეტრია. საავტომობილო გზების დეპარტამენტის ცნობით, ქვეშეთი-კობის პროექტის ფარგლებში, ჯამში, შენდება განათების სისტემით უზრუნველყოფილი 23 კმ-იანი 2-ზოლიანი ასფალტ-ბეტონის გზა, რომელიც მოიცავს 5 ხიდისა და 5 გვირაბის მშენებლობას და ერთი ხიდის რეაბილიტაციას. ამასთან, პროექტი ითვალისწინებს გუდაურამდე მისასვლელი 5 კმ-იანი ახალი გზის და ტურისტული ცენტრის მშენებლობას. ქვეშეთი-კობის გზის მშენებლობის პროექტი შენდება აზიის განვითარების ბანკის (ADB) ფინანსური მხარდაჭერით, ხოლო, გვირაბის მშენებლობის ნაწილი - ევროპის რეკონსტრუქციისა და განვითარების ბანკის (EBRD). პროექტის საერთო ღირებულება 1.2 მილიარდი ლარია. ქვეშეთი-კობის 23 კმ-იანი გზის მშენებლობის დასრულება, ეტაპობრივად, 2024-2025 წლებში იგეგმება. „სხვადასხვა თვალსაზრისით, ეკონომიკური, სატრანზიტო, სოციალური თვალსაზრისით არის უმნიშვნელოვანესი ეს უნიკალური პროექტი, რომელიც საბოლოოდ დასრულდება მომავალ წელს“, - თქვა პრემიერ-მინისტრმა ირაკლი კობახიძემ, რომელიც გვირაბის გაჭრის დასრულების ღონისძიებაზე იმყოფებოდა. მან დაამატა: „ეს იქნება 23-კილომეტრიანი გზის მონაკვეთი, რაც 45 წუთით შეამცირებს დღევანდელი ერთსაათიანი მგზავრობის დროს, ასევე სამი თვის განმავლობაში უამინდობის გამო, აქ იკეტებოდა გზა, რაც აღარ იქნება საჭირო გამომდინარე იქიდან, რომ აბსოლუტურად უსაფრთხო იქნება გზის ეს მონაკვეთი“. ასევე ნახეთ „გადავარჩინოთ უნიკალური ხადის ხეობა” - ქვეშეთი-კობის გზის თემაზე პეტიცია ვრცელდება ქვეშეთი-კობის გზის მშენებლობას 2020 წელს აპროტესტებდნენ ადგილობრივი მოსახლეობის ნაწილი, ხელოვნებათმცოდნეები, არქეოლოგები, ბიომრავალფეროვნების ექსპერტები და გარემოს დამცველები. ისინი საქართველოს მთავრობას და საერთაშორისო ბანკებს მოუწოდებდნენ, რომ რუსეთისკენ მიმავალი ქვეშეთი-კობის გზის მონაკვეთი ხადის ხეობის გავლით არ აშენებულიყო. ასევე ნახეთ „ახალი როკის გვირაბი“ თუ უსაფუძვლო შიშები? 2019 წელს საქართველოს მესამე პრეზიდენტმა, მიხეილ სააკაშვილმა, რუსეთთან დამაკავშირებელ ე.წ. „საქართველოს სამხედრო გზაზე“ ჩქაროსნული მაგისტრალის მშენებლობის პროექტს „ახალი როკის გვირაბი“ უწოდა. ...