25 აპრილის ღამით, მოსკოვის სასამართლომ კორუფციაში ეჭვმიტანილი რუსეთის თავდაცვის მინისტრის მოადგილის, ტიმურ ივანოვის უძრავი ქონება, აქტივები და საბანკო ანგარიშები დააყადაღა. სააგენტო „ტასის“ ცნობით, ბრალდებული მაღალჩინოსნის გარდა, სასამართლომ დააყადაღა ასევე ტიმურ ივანოვის ნათესავების - მისი მეუღლის, ყოფილი ცოლების და ხუთი შვილის - რეგისტრირებული აქტივები. დაყადაღებული ქონების ღირებულება არ არის ცნობილი. სასამართლოს გადაწყვეტილების თანახმად, ქონების დაყადაღება მოხდა დროებითი ღონისძიებების მიზნებისთვის იმ შემთხვევისთვის, თუ შემდგომში სასამართლო თავდაცვის მინისტრის ყოფილ მოადგილეს დამნაშავედ ცნობს. გენერალი ტიმურ ივანოვი მოსკოვის სასამართლომ 24 აპრილის დილით დააპატიმრა. მალევე რუსეთის თავდაცვის მინისტრმა სერგეი შოიგუმ ხელი მოაწერა თავისი მოადგილის გადაყენების ბრძანებას. ტიმურ ივანოვის წინააღმდეგ აღძრული სისხლის სამართლის საქმის ფარგლებში იკვლევენ თავდაცვის სამინისტროს საჭიროებებისთვის ჩატარებული საიჯარო საქმიანობის დეტალებს. გამოძიება თავდაცვის მინისტრის ყოფილ მოადგილეს განსაკუთრებით დიდი ოდენობის ქრთამის აღებაში სდებს ბრალს, რასაც თავად ივანოვი უარყოფს. გამოძიება მიიჩნევს, რომ თავდაცვის მინისტრის მოადგილე "დანაშაულებრივ გარიგებაში შევიდა მესამე პირებთან". ივანოვთან ერთად დააკავეს რამდენიმე ადამიანი, რომლებიც, გამოძიების ვერსიით, "შუამავლების რთული ჯაჭვის" მეშვეობით ფულის გადაცემაში მონაწილეობდნენ. ასევე ნახეთ სახელმწიფო ღალატი თუ ქრთამი? - რისთვის დააპატიმრეს სერგეი შოიგუს მოადგილე ერთ-ერთი მათგანია ბიზნესმენი სერგეი ბოროდინი, რომელსაც საგამოძიებო კომიტეტმა ასევე წაუყენა ქრთამის აღების ბრალდება. საქმეში ეჭვმიტანილად ფიგურირებს მესამე პირიც, კომპანია "ოლიმპსისტროის" თანამფლობელი ალექსანდრ ფომინი, რომელიც ეჭვმიტანილია ტიმურ ივანოვისთვის ქრთამის მიცემაში. მოსკოვის სასამართლომ 24 აპრილს ფომინსაც მიუსაჯა 23 ივნისამდე წინასწარი პატიმრობა. რუსეთში მეორე დღეა აქტიურად განიხილება ვერსია, რომ გენერალ ტიმურ ივანოვის დაპატიმრების რეალური მიზეზი შესაძლოა სახელმწიფო ღალატი იყოს. "ქრთამი პუბლიკისთვისაა, რადგან [ხელისუფლებას] ჯერჯერობით სახელმწიფო ღალატზე საჯაროდ არ სურს ლაპარაკი", - უთხრა რუსეთის "ეფესბესთან" დაახლოებულმა ერთ-ერთმა წყარომ გამოცემა "ვაჟნიე ისტორიის". სახელმწიფო ღალატის შესახებ ვერსიას "სპეკულაცია" უწოდა რუსეთის პრეზიდენტის პრესმდივანმა დმიტრი პესკოვმა, რომელმაც მედიის წარმომადგენლებს ურჩია, რომ "ოფიციალურ ინფორმაციაზე ორიენტირდნენ". ...