საქართველოს პროკურატურა ავრცელებს ინფორმაციას იმ ოთხი ადამიანის დაკავებაზე, რომლებსაც ევროპის ბიბლიოთეკებში რარიტეტული გამოცემების ქურდობა ედებათ ბრალად. გამოძიება რამდენიმე ქვეყნის ჩართულობით მიმდინარეობდა და მასში ჩართული იყვნენ შვეიცარიის, საფრანგეთისა და ლიეტუვის სამართალდამცავი ორგანოების თანამშრომლები. ოთხივე ეჭვმიტანილი საქართველოს ტერიტორიაზე დააკავეს. გამოძიების ფარგლებში "ათეულობით ფიზიკური პირის, მათი საცხოვრებელი ბინების და მათთან დაკავშირებული წიგნების სარეალიზაციო ადგილების ჩხრეკა განხორციელდა. ამოღებულია დიდი ოდენობით ფულადი თანხა და ასეულობით წიგნი, მათ შორის, ერთ-ერთი დაკავებული პირის საცხოვრებელი სახლის ჩხრეკის შედეგად ამოღებულია, სავარაუდოდ, პარიზის ეროვნული ბიბლიოთეკიდან მოპარული, მე-19 საუკუნეში გამოცემული, ფრანგულენოვანი წიგნი", - ნათქვამია პროკურატურის მიერ გავრცელებულ პრესრელიზში. გამოძიების ვერსიით, ორგანიზებულმა ჯგუფმა 2022 წლის დასაწყისიდან დაიწყო მზადება ევროპის ბიბლიოთეკების ძარცვის გეგმის მომზადებაზე. ისინი იყენებდნენ ყალბ პირადობის მოწმობებს, გამოგონილ სახელებს და გვარებს და ბიბლიოთეკებიდან გამოტანილ ორიგინალ გამოცემებს წინასწარი გამზადებული ყალბი ასლებით ანაცვლებდნენ. "წინასწარ შემუშავებული დანაშაულებრივი გეგმის თანახმად, ორგანიზებული ჯგუფის წევრებს საფრანგეთის, გერმანიის, ლატვიის, ლიეტუვის, ესტონეთის, შვეიცარიის, პოლონეთის და ჩეხეთის ეროვნულ და საუნივერსიტეტო ბიბლიოთეკებში წასაკითხად უნდა აეღოთ მე-19 საუკუნის კლასიკოსი მწერლების წიგნები, რასაც ფარულად დაეუფლებოდნენ და მათ - ორიგინალი წიგნების მაღალი ხარისხის ასლებით ჩაანაცვლებდნენ. ზემოხსენებული დანაშაულებრივი სქემის შესაბამისად, ორგანიზებული ჯგუფის წევრები 2022-23 წლებში, ევროპის სხვადასხვა ქალაქების ბიბლიოთეკებიდან ასეულობით ათასი ევროს ღირებულების წიგნებს ფარულად დაეუფლნენ", - ნათქვამია პროკურატურის განცხადებაში. დაკავებულებს ბრალად ედებათ ქურდობა, ჩადენილი ორგანიზებული ჯგუფის მიერ და დიდი ოდენობით. ბრალის დამტკიცების შემთხვევაში მათ 6-დან 10 წლამდე პატიმრობა ემუქრებათ. პროკურატურა არ აკონკრეტებს დაკავების ადგილს, დაკავებულების სქესს, ასაკს და მათ შესაძლო ნათესაურ კავშირს ერთმანეთთან. განცხადება არ მოიცავს არც ცნობებს იმის შესახებ, ვინ იყვნენ ქართველი წიგნის ქურდების პოტენციური ან რეალური კლიენტები. ინფორმაცია ქართველ ქურდებზე, რომლებიც ევროპის ბიბლიოთეკებს ორგანიზებულად ძარცვავდნენ, დასავლურ მედიაში გასულ წელს გამოჩნდა. სხვადასხვა დროს საფრანგეთსა და ბელგიაში დააკავეს რამდენიმე ადამიანი. ასევე ნახეთ „ოპერაცია პუშკინი“ - როგორ იპარავდნენ უნიკალურ რუსულ წიგნებს ქართველები ევროპაში ქართველი წიგნის ქურდებისგან ევროპის ბიბლიოთეკებისთვი...