რუსეთმა და უკრაინამ პირველად გამართეს ომის შედეგად დევნილი ბავშვების საკითხზე პირისპირ მოლაპარაკებები. შეხვედრა დოჰაში კატარის შუამავლობით გაიმართა. ამის შესახებ განაცხადა რუსეთის ფედერაციის პრეზიდენტის წარმომადგენელმა და ბავშვთა უფლებების ომბუდსმენმა მარია ლვოვა-ბელოვამ. მისი თქმით, მხარეები შეთანხმდნენ, რომ რუსეთიდან უკრაინაში 29 ბავშვს ჩაიყვანენ, უკრაინიდან რუსეთში კი 19 ბავშვს. კიევი ირწმუნება, რომ ოკუპანტებმა სრულმასშტაბიანი შეჭრის დაწყებიდან რუსეთსა თუ ოკუპირებულ ტერიტორიებზე 19 ათასზე მეტი ბავშვი გადაიყვანეს. ლვოვა-ბელოვამ ამ ინფორმაციას სიყალბე უწოდა. იანვარში უკრაინის ვერხოვნა რადის ადამიანის უფლებათა კომისარმა დიმიტრი ლუბენეცმა განაცხადა, რომ საომარი მოქმედებების დაწყების შემდეგ უკრაინაში დაბრუნდა 517 ბავშვი და 2 828 ზრდასრული. 2023 წლის დეკემბერში მარია ლვოვა-ბელოვამ თქვა, რომ ოჯახებში დააბრუნეს ყველა ბავშვი, რომლებიც 2022 წლის შემოდგომაზე ფრონტის ხაზის ცვლილების გამო ახლობლებისგან მოწყვეტილი აღმოჩნდნენ. უკრაინის ხელისუფლება რუსეთს ფართომასშტაბიანი ინტერვენციის შემდეგ ოკუპირებული ტერიტორიებიდან ბავშვების დეპორტაციაში ადანაშაულებს. რუსეთის ხელისუფლება კი აცხადებს, რომ ბავშვები არა დეპორტირებული, არამედ ევაკუირებული იყვნენ, რადგან მათ საფრთხე ემუქრებოდათ. ასევე ნახეთ ომის ბავშვები - როგორ მიჰყავთ უკრაინელი პატარები რუსეთში 2023 წელს ICC-მ გასცა რუსეთის პრეზიდენტ ვლადიმირ პუტინისა და რუსეთის ფედერაციის ბავშვთა ომბუდსმენის, მარია ლვოვა-ბელოვას დაპატიმრების ორდერები. ისინი ეჭვმიტანილი არიან უკრაინის ოკუპირებული ტერიტორიებიდან რუსეთში ბავშვების დეპორტაციაში. მოსკოვი არ მონაწილეობს სასამართლოს მუშაობაში და აცხადებს, რომ არ ცნობს მის იურისდიქციას. ...