აშშ-ის არაერთ უნივერსიტეტში ღაზის სექტორში ომის საწინააღმდეგო გამოსვლები გრძელდება, სტუდენტები აკრიტიკებენ სასწავლო დაწესებულებების ხელმძღვანელობას პოლიციის გამოძახების გამო. ბოლო კვირაში არაერთი აქციის დროს დააკავეს ათეულობით პირი, სტუდენტებს შეტაკება ჰქონდათ პოლიციასთან. 27აპრილს სტუდენტებმა, რომლებიც ისრაელსა და აშშ-სა და ევროკავშირში ტერორისტულად შერაცხილ ჰამასს შორის ომის გამო პროტესტს გამოთქვამენ, და რომლებსაც შეტაკება ჰქონდათ პოლიციასთან, პირობა დადეს, რომ დემონსტრაციებს გააგრძელებენ. იელის უნივერსიტეტის სტუდენტები კვირის დასაწყისში მოითხოვდნენ ასევე ინვესტიციების შეწყვეტას იმ თავდაცვით კომპანიებში, რომლებიც ბიზნესს აწარმოებენ ისრაელთან. ზოგიერთი ფაკულტეტის სტუდენტებმა კრიტიკა გამოთქვეს მათი უნივერსიტეტების ხელმძღვანელთა მიმართ, რომლებმაც სამართალდამცავები გამოიძახეს სტუდენტთა დემონსტრაციის დასაშლელად. კოლუმბიის უნივერსიტეტი აგრძელებს პროპალესტინურად განწყობილი სტუდენტების ბანაკთან მოლაპარაკებას. ამ უნივერსიტეტმა, რომლის ტერიტორიაზეც და მის ფარგლებს გარეთაც იყო საპროტესტო გამოსვლები, სასწავლო პროცესი დისტანციურ რეჟიმზე გადაიყვანა. გასულ კვირაში უნივერსიტეტის კამპუსში დააპატიმრეს პალესტინელთა მხარდამჭერი საპროტესტო გამოსვლების ასზე მეტი მონაწილე, რომლებმაც კარვების ბანაკი მოაწყვეს მის ტერიტორიაზე. კვირის დასაწყისში კამპუსის შესასვლელში ორ ათეულამდე ადამიანი გაიძახოდა ლოზუნგს „მდინარიდან ზღვამდე პალესტინა თავისუფალი იქნება!“ შორიახლო საპროტესტო აქციას მართავდა ისრაელის მხარდამჭერი დემონსტრანტების ჯგუფი. საპროტესტო გამოსვლებმა სტუდენტების მრავალი კამპუსი მოიცვა მას შემდეგ, რაც 2023 წლის 7 ოქტომბერს ისრაელს თავს დაესხა ჰამასი, რომლის მეომრებმა დახოცეს 1200-ზე მეტი ადამიანი და 250-მდე მძევლად წაიყვანეს ღაზაში. ამის საპასუხოდ ისრაელმა ღაზაში, რომელსაც ჰამასი აკონტროლებს, სამხედრო ოპერაცია დაიწყო დაჯგუფების განადგურების მიზნით. ღაზის ჯანდაცვის სამინისტროს ცნობით, ისრაელის არმიის იერიშის შედეგად ოქტომბრიდან მოყოლებული ღაზის სექტორში დაიღუპა 34 ათასი პალესტინელი - ძირითადად ქალები და ბავშვები. ასევე ნახეთ აშშ-ის უნივერსიტეტები პალესტინელთა მხარდამჭერმა აქციებმა მოიცვა ...