პოლონეთის პრემიერ-მინისტრის, დონალდ ტუსკის თქმით, ერთ-ერთი რაკეტა, რომელიც რუსეთის მიერ იყოს გატყორცნილი, უკრაინის ტერიტორიაზე, პოლონეთის საზღვრიდან 15 კილომეტრში დაეცა. X-ით გავრცელებულ განცხადებაში, ტუსკი წერს, რომ უკრაინის ლვოვის ოლქში 27 აპრილს „ათეულობით ბომბი და რაკეტა ჩამოვარდა“. იქვე ტუსკმა გააკრიტიკა თავისი წინამორბედი, პოლონეთის ყოფილი პრემიერ-მინისტრი, მატეუშ მორავეცკი: „ამ დროს მორავეცკი ამუშავებს ერთობლივ ანტიევროპულ სტრატეგიას პუტინის მომხრე ულტრამემარჯვენე პოლიტიკოსებთან ერთად ბუდაპეშტში. სიბრიყვეა? ღალატია? ერთიც და მეორეც? - დაწერა ტუსკმა. სავარაუდოდ, ტუსკი გულისხმობს ეროვნულ-კონსერვატიული ჯგუფების შეხვედრას ბუდაპეშტში, რომელშიც, სხვათა შორის, მონაწილეობდა საქართველოს პრემიერ-მინისტრი, ირაკლი კობახიძე. ასევე ნახეთ „ე.წ. ლიბერალები რისკის ქვეშ აყენებენ ერების იდენტობას“ - კობახიძე უნგრეთში ბუდაპეშტში მორავეცკის ახლდა პოლონეთის პრეზიდენტის კაბინეტის მეთაური, მარჩინ მასტალერეკი. რუსეთის არმია სისტემატურად უტევს უკრაინას სხვადასხვა ტიპის იარაღით. მტკიცებულების და თვითმხილველთა ცნობების მიუხედავად, მოსკოვი უარყოფს, რომ მიზნობრივად ესხმის თავს სამოქალაქო ობიექტებს. უკრაინის საჰაერო ძალების ინფორმაციით, 27 აპრილის ღამეს რუსეთმა უკრაინას 34 რაკეტა ესროლა, მათგან 21 ჩამოაგდეს. რუსეთის თავდაცვის სამინისტროს თავდასხმაზე კომენტარი არ გაუკეთებია. ასევე ნახეთ დონალდ ტუსკი აცხადებს, რომ ბრიუსელი „ორბანისგან დაიღალა“ ...