აშშ-ში და ევროპაში ტერორისტულ დაჯგუფებად შერაცხილი ჰამასის შეიარაღებულმა ფრთამ 27 აპრილს გამოაქვეყნა ვიდეოჩანაწერი, რომელზეც ჩანს ისრაელიდან 7 ოქტომბერს გატაცებული მძევლები, ორი კაცი. „მძევლების და უგზო-უკვლოდ დაკარგულთა ოჯახების ფორუმი“ თავის განცხადებაში იტყობინება, რომ ეს ორი პირი არიან კიტ სიგელი და ომრი მირანი, ჰამასის მიერ 7 ოქტომბერს სამხრეთ ისრაელიდან გატაცებული. „დასტური იმისა, რომ კიტ სიგელი და ომრი მირანი ცოცხლები არიან, ყველაზე ნათლად მოწმობს, რომ ისრაელის მთავრობამ ყველაფერი უნდა გააკეთოს, რათა დათანხმდეს მორიგებას მძევლების გათავისუფლების შესახებ დამოუკიდებლობის დღემდე (14 მაისი)“ - ნათქვამია ფორუმის განცხადებაში. ბოლო ვიდეო გამოჩნდა სამი დღის მერე მას შემდეგ, რაც ჰამასმა გამოაქვეყნა კიდევ ერთი ვიდეო, რომელზეც მძევალი ჰერშ გოლბერგ-პოლინი ჩანს. ვიდეოზე შესამჩნევია, რომ მძევლები ზეწოლის ქვეშ ლაპარაკობენ. „ჰამასის ტყვეობაში ვარ უკვე 202 დღეა. ვითარება უსიამოვნოა, რთულია, ბევრი ბომბი [ცვივა]“ - ამბობს მირანი ვიდეოზე და მიანიშნებს, რომ ჩანაწერი ამ კვირის დასაწყისშია გადაღებული. „დრო მოვიდა, დაიდოს შეთანხმება, რომელიც შესაძლებლობას მოგვცემს აქედან ჯანმრთელი და უვნებელი გამოვაღწიოთ... გააგრძელეთ პროტესტი და შეთანხმება მიღწეული იქნება“. 27 აპრილის ვიდეო გამოქვეყნდა მაშინ, როცა ჰამასმა განაცხადა, რომ შეისწავლის ცეცხლის შეწყვეტის შესახებ ისრაელის შემხვედრ წინადადებას, რის შემდეგაც მედია იტყობინებოდა, რომ შუამავალმა - ეგვიპტემ - მიავლინა ისრაელში დელეგაცია შეფერხებული მოლაპარაკების გასაგრძელებლად. ჰამასის მეომრებმა ისრაელის სამხრეთში 7 ოქტომბრის იერიშის დროს დახოცეს 1200-ზე მეტი ადამიანი და 250-მდე მძევლად წაიყვანეს ღაზაში. ამის საპასუხოდ ისრაელმა ღაზაში, რომელსაც ჰამასი აკონტროლებს, სამხედრო ოპერაცია დაიწყო ჰამასის განადგურების მიზნით. მძევლების ნაწილი შარშან გათავისუფლდა ცეცხლის მცირე ხნით შეწყვეტის შედეგად. მათი ნაწილი სხვადასხვა ვითარებაში დაიღუპა. ღაზის ჯანდაცვის სამინისტროს ცნობით, ისრაელის არმიის იერიშის შედეგად ოქტომბრიდან მოყოლებული ღაზის სექტორში დაიღუპა 34 ათასი პალესტინელი - ძირითადად ქალები და ბავშვები. ასევე ნახეთ აშშ-ის უნივერსიტეტები პალესტინელთა მხარდამჭერმა აქციებმა მოიცვა ასევე ნახეთ ჰამასი ვერ შეძლებს 40 ისრაელელი მძევლის შერჩევას პალესტინელ პატიმრებში გადასაცვლელად ...