დღეს, კვირას, 28 აპრილს, 19:00 საათზე „აგენტების კანონის“ წინააღმდეგ მორიგი აქციაა დაგეგმილი, ამჯერად არასამთავრობო ორგანიზაციებისა და ოპოზიციური პარტიების მონაწილეობით. 25 აპრილს საზოგადოებრივმა ორგანიზაციებმა და მედიასაშუალებებმა განაცხადეს, რომ არავითარ შემთხვევაში არ დარეგისტრირდებიან „ღირსების შემლახავ რეესტრში“, და კანონის გასაპროტესტებლად საზოგადოება კვირა საღამოს მიიწვიეს რესპუბლიკის მოედანზე. ხელახლა ინიციირებული კანონპროექტი „აგენტების შესახებ“ პირველი მოსმენით 2024 წლის 17 აპრილს დაამტკიცეს. პარლამენტში მეორე საკომიტეტო მოსმენა ორშაბათს, 09:00 საათზეა დაგეგმილი. პლენარულ სესიაზე მეორე მოსმენით გატანის თარიღი დაზუსტებული ჯერ არ არის. ორშაბათსვე, 29 აპრილს, მმართველი პარტია „ქართული ოცნება“ თბილისში „აგენტების კანონის“ მხარდამჭერი აქციის ჩატარებას გეგმავს. მესამე და საბოლოო მოსმენით კანონპროექტის მიღების სავარაუდო თარიღი კი 17 მაისია. ოპოზიციურმა პარტიებმა, - მათ შორის „ერთიანმა ნაციონალურმა მოძრაობამ“, „ახალმა“, ზურაბ ჯაფარიძის „გირჩმა“, „დროამ“ და „ლელო“, - განაცხადეს, რომ კვირას, 28 აპრილს „აგენტების კანონის“ წინააღმდეგ დაგეგმილ საპროტესტო დემონსტრაციას უერთდებიან. ოპოზიციური პარტიები ასევე აცხადებენ, რომ ორშაბათს „ქართული ოცნების“ დაგეგმილ შეკრებაზე „საჯარო სამსახურებში დასაქმებულ ადამიანებს საკუთარი ნების საწინააღმდეგოდ თბილისში ჩამოიყვანენ“ და ეს შეკრება არის „ამ ადამიანების შეურაცხყოფა, რუსული ხელისუფლების მიერ მათი გამოყენება ჩვენი საერთო ევროპული მომავლის წინააღმდეგ“. ასევე ნახეთ ოპოზიციური პარტიები კვირას დანიშნულ აქციას უერთდებიან „აგენტების კანონის“ წინააღმდეგ „აგენტების კანონი“, - ფორმალურად „უცხოეთის გავლენის გამჭვირვალობის კანონპროექტი“, - პირველი მოსმენით 17 აპრილს დაამტკიცეს - 83 ხმით. 13 თვით ადრე, 2023 წლის მარტში კი, ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. კანონი ეხება საქართველოში არსებულ თითქმის ყველა არასამთავრობო ორგანიზაციას და არაერთ მედიასაშუალებას, მათ შორის - რადიო თავისუფლებასაც. კანონპროექტის პარლამენტში დაბრუნების შემდეგ თბილისში საპროტესტო დემონსტრაციები დაიწყო. ევროკავშირმა და ამერიკის შეერთებულმა შტატებმა საქართველოს ხელისუფლება არაერთხელ გააფრთხილეს, რომ კანონის მიღება უარყოფითად იმოქმედებს ევროკავშირისკენ საქართველოს სვლაზე. ასევე ნახეთ სრული სიმართლე „აგენტების კანონზე“ ...