შინაგან საქმეთა სამინისტრო მოუწოდებს „აგენტების კანონის“ წინააღმდეგ გამოსულ დემონტრანტებს, „დაიცვან საზოგადოებრივი წესრიგი“ და არ დააზიანონ პარლამენტის წინ სასცენო ინვენტარი. მრავალრიცხოვანმა საპროტესტო დემონსტრაციამ „აგენტების კანონის“ წინააღმდეგ რესპუბლიკის მოედნიდან პარლამენტთან გადაინაცვლა. აქციაში მონაწილეობს ათობით ათასი ადამიანი. ამ წუთებში პარლამენტთან შინაგან საქმეთა სამინისტროს თანამშრომლების რაოდენობა იმატებს. თავისუფლების მოედანზე მობილიზებულია საპოლიციო ტექნიკა (ჭყლის ჭავლის მანქანები). „ეს არის ანტირუსული ადგილი, აქ რუსულ კანონს ვერ დაამტკიცებს ბიძინა ივანიშვილი“ - თქვა მწერალმა ლაშა ბუღაძემ. აქციის მონაწილეებმა პოლიციელებს მიმართეს, მისცენ უფლება, „ქართული ოცნების“ მოწყობილ სცენაზე, - რომელიც 29 აპრილს „ქართული ოცნების“ მხარდამჭერი დემონსტრაციისთვის არის გამზადებული“, - 10-მდე დემონსტრანტი აუშვან, რათა მათ საქართველოსა და ევროკავშირის დროშების გაშლა მოახერხონ. პოლიცია, ჯერჯერობით, აქციის მონაწილეებს ამის საშუალებას არ აძლევს. როგორც პარტია "ნაციონალური მოძრაობის" ერთ-ერთმა ლიდერმა სოფო ჯაფარიძემ და საპროტესტო აქციების ერთ-ერთმა ორგანიზატორმა გიორგი ქადაგიძემ პოლიციელებს უთხრეს, დემონსტრანტები არ ეცდებიან პოლიციის „მიწოლას“, ამიტომ სთხოვეს, მათი თხოვნა სცენაზე აშვებასთან დაკავშირებით გადასცენ ზემდგომ პირებს. გიორგი ქადაგიძის თქმით, სცენაზე დროშით ხელში ასვლით დასრულდება ესკალაცია. შსს იუწყება, რომ უწყების თანამშრომლები რუსთაველის „გამზირზე მიმდინარე აქციასთან დაკავშირებით, მობილიზებულნი არიან და იცავენ მოქალაქეების უსაფრთხოებას“. „მოვუწოდებთ აქციის ორგანიზატორებსა და მონაწილეებს, არ გასცდნენ შეკრების და გამოხატვის თავისუფლების კანონით დასაშვებ ფარგლებს და დაიცვან საზოგადოებრივი წესრიგი. ასევე, მოვუწოდებთ აქციის თითოეულ მონაწილეს არ დააზიანონ რუსთაველის გამზირზე, საკანონმდებლო ორგანოს წინ მოწყობილი სცენის ინვენტარი და ტექნიკა“, - წერია პოლიციის მიერ გავრცელებულ განცხადებაში. „კანონდარღვევის ნებისმიერი ფაქტი პოლიციის მხრიდან დაუყოვნებლივ იქნება აღკვეთილი“, - აცხადებს სამინისტრო. ...