პარლამენტის იურიდიული კომიტეტის სხდომიდან 14 დეპუტატი და არასამთავრობო ორგანიზაციების სამი წარმომადგენელი გააძევა, რამდენიმეს კი სიტყვის დამთავრების საშუალება არ მისცა და გამოსვლა შეაწყვეტინა სხდომის თავმჯდომარემ ანრი ოხანაშვილმა. სხდომაზე მეორე მოსმენით განიხილება სადავო “აგენტების კანონი”. სხდომიდან გაძევებული დეპუტატები არიან ოპოზიციური პარტიების წევრები გიორგი ვაშაძე, ლევან ბეჟაშვილი, სალომე სამადაშვილი, თამარ კორძაია, თაკო ჩარკვიანი, ქეთევან თურაზაშვილი, ანა წითლიძე, ლევან ხაბეიშვილი, დავით ხაჯიშვილი, გიორგი გოდაბრელიძე, თინა ბოკუჩავა, ნიკა მაჭუტაძე, თეონა აქუბარდია და ხატია დეკანოიძე. კოლეგების დარბაზიდან გაძევების მიზეზად ანრი ოხანაშვილმა თითქმის ყველა შემთხვევაში რეგლამენტის დარღვევა დაასახელა. კერძოდ, ოხანაშვილი მიუთითებს, რომ დეპუტატები „არ სვამდნენ კითხვებს II მოსმენის პრინციპებით და სვამდნენ I მოსმენის პრინციპის შესაბამისად”, ასევე მიკროფონის ჩართვის გარეშე სვამენ კითხვებს და ხელს უშლიან განხილვის პროცესს. ხატია დეკანოიძის მიერ დარბაზის დატოვებას მოჰყვა ხმაური და დაპირისპირება უმრავლესობის დეპუტატთან, გურამ მაჭარაშვილთან. დეკანოიძემ უმრავლესობის წევრებს „რუსები“ და „არარაობები“ უწოდა. მისმა ამ რეპლიკამ გამოიწვია გურამ მაჭარაშვილის პროტესტი - მან აღნიშნა, რომ ხატია დეკანოიძე არის ადამიანი, რომელმაც უკრაინაში თანამდებობის გამო საქართველოს მოქალაქეობა დატოვა. სიტყვიერი დაპირისპირების შემდეგ ხატია დეკანოიძემ გურამ მაჭარაშვილს ბოთლი ესროლა. დეპუტატების გარდა, საკომიტეტო განხილვიდან გააძევეს "საერთაშორისო გამჭვირვალობა-საქართველოს" წარმომადგენელი ლიკა საჯაია; ნათია კუპრაშვილი, "რეგიონულ მაუწყებელთა ასოციაციის" ხელმძღვანელი და გიორგი დავითური, "ინფორმაციის თავისუფლების ინსტიტუტის" წარმომადგენელი. ლიკა საჯაიას დარბაზის დატოვებისას სხდომის წამყვანმა ანრი ოხანაშვილმა "უზრდელი" უწოდა, ნათია კუპრაშვილს კი უთხრა, რომ ის შეურაცხყოფას აყენებდა მის კოლეგა დეპუტატებს. "დატოვეთ დარბაზი. შეურაცხყოფას აყენებთ დეპუტატებს, ამის უფლებას არ მოგცემთ. უზრდელი ხართ, ქალბატონო ლიკა. ეს არ არის გასაკვირი, მაგრამ სამწუხაროა, რომ ამას აკეთებთ სხდომათა დარბაზში. თქვენ იმის წარმოდგენა არ გაქვთ, სად ხართ, თქვენ განცდა არ გაქვთ, რომ ეს არის საქართველოს პარლამენტი. ამიტომ გაბრძანდით აქედან და ზრდილობა ისწავლეთ, როგორ უნდა მიმართოთ ხალხის მიერ არჩეულ დეპუტატებს. უზრდელად მოქცევის საშუალებას არ მოგცემთ“, - ასე მიმართა ლიკა საჯაიას ანრი ოხანაშვილმა. არასამთავრობო ორგანიზაციების შეფასებით, ანრი ოხანაშვილი სადავო კანონპროექტის განხილვისას "ბოროტად იყენებს უფლებამოსილებას და ზღუდავს დეპუტატების საქართველოს პარლამენტის რეგლამენტით გარან...