ნატოს გენერალური მდივანი იენს სტოლტენბერგი 29 აპრილს მოულოდნელი ვიზიტით ჩავიდა კიევში, სადაც უკრაინელებს უთხრა, რომ იარაღი და საბრძოლო მასალები იქ ინტენსიურად შევა. მან ეს განაცხადა მას შემდეგ, რაც აღიარა, რომ დასავლელმა მოკავშირეებმა ჯეროვნად ვერ შეასრულეს სამხედრო დახმარების პირობა. ეს სტოლტენბერგის მესამე ვიზიტია უკრაინაში მას მერე, რაც 2022 წლის თებერვალში იქ რუსეთი სრული მასშტაბით შეიჭრა. კიევში, უკრაინის პრეზიდენტთან, ვოლოდიმირ ზელენსკისთან ერთად გამართულ პრესკონფერენციაზე, სტოლტენბერგმა თქვა, რომ "მხარდაჭერაში სერიოზული შეფერხებები ნიშნავდა სერიოზულ შედეგებს ბრძოლის ველზე". "აშშ-მა თვეების განმავლობაში ვერ შეძლო შეთანხმება პაკეტზე და ევროპელმა მოკავშირეებმა ვერ შეძლეს საბრძოლო მასალების დაპირებული მასშტაბით მოწოდება", - აღნიშნა სტოლტენბერგმა და დასძინა: "თვეების განმავლობაში უკრაინაზე იარაღის უპირატესობა ჰქონდათ, [უკრაინა] იძულებული იყო საბრძოლო მასალები გამოეზოგა. ... დამატებითი დახმარება მოდის". აშშ-ის პრეზიდენტმა ჯო ბაიდენმა დახმარების პაკეტს ხელი 24 აპრილს მოაწერა - მას მერე, რაც ის იოლად დაამტკიცა აშშ-ის სენატმა. კანონპროექტი წარმომადგენელთა პალატაში იყო თვეების განმავლობაში შეჩერებული, თუმცა რესპუბლიკელმა ლიდერებმა ბოლოს ის კენჭისყრაზე დააყენეს და კანონპროექტი 20 აპრილს დამტკიცდა - სენატში გაგზავნამდე. ამ კანონპროექტით გათვალისწინებულია 61 მილიარდი დოლარის ოდენობის სამხედრო დახმარების გამოყოფა უკრაინისთვის. ასევე ნახეთ სტოლტენბერგი: ნატო არ გეგმავს ბირთვული იარაღის დისლოკაციის ზონის გაფართოებას ...