საქართველოს იუსტიციის მინისტრი რატი ბრეგაძე აცხადებს, რომ ევროპარლამენტის 25 აპრილის რეზოლუცია, რომელიც „აგენტების კანონს“ უკავშირდებოდა, საქართველოს ყოფილი პრეზიდენტის, მიხეილ სააკაშვილის შესახებ „ფაქტებით გაუმყარებელია“ და რეზოლუციის ტექსტთან წინააღმდეგობაში მოდის თავად სააკაშვილის სტრასბურგის სასამართლოსთან კომუნიკაცია. რატი ბრეგაძემ 29 აპრილს იუსტიციის სამინისტროში ბრიფინგზე ჟურნალისტებს განუცხადა, რომ 18 აპრილს მიხეილ სააკაშვილის ადვოკატმა მიმართა სტრასბურგის სასამართლოს საჩივრის გახმობის მიზნით და მიუთითა, რომ ექსპრეზიდენტის ჯანმრთელობის მდგომარეობა არ არის სიცოცხლისთვის სახიფათო. „ევროპარლამენტის რეზოლუციის ტექსტში მოთხოვნილია, რომ მსჯავრდებული სააკაშვილი გათავისუფლებული იყოს ჰუმანიტარული მიზნით და გადაყვანილი იყოს უცხო სახელმწიფოში სამკურნალოდ. სრულ შეუსაბამობასთან გვაქვს საქმე. 18 აპრილს ჯერ კიდევ სააკაშვილი თავად ითხოვს სარჩელის ამორიცხვას, ასევე აღნიშნავს, რომ მისი მდგომარეობა არ არის სიცოცხლისთვის სახიფათო, ხოლო ევროპარლამენტის რეზოლუციაში კი მოთხოვნილია მისი საზღვარგარეთ სამკურნალოდ გადაყვანა“, - განაცხადა იუსტიციის მინისტრმა. მისი თქმით, ეს მოწმობს, რომ ამ „რეზოლუციის მინიმუმ ეს პუნქტი არის საკმაოდ ტენდენციური“, ხოლო ევროპარლამენტარებზე „დიდი გავლენა იქონია დეზინფორმაციამ, რასაც მიხეილ სააკაშვილი და „ნაციონალური მოძრაობა“ ავრცელებენ“. მინისტრის ცნობით, ამ საკითხზე შეტყობინება ადამიანის უფლებათა ევროპული სასამართლოდან 25 აპრილს მიიღეს. სააკაშვილის ადვოკატმა შოთა თუთბერიძემ რადიო თავისუფლებას დაუდასტურა, რომ სააკაშვილმა სტრასბურგის სასამართლოდან საჩივარი გაიწვია და თქვა, რომ მიხეილ სააკაშვილმა ბოლო სასამართლო პროცესზე, - რომელიც17 აპრილს გაიმართა, - განმარტა, რომ მისი საკითხი მეორეხარისხოვანია. три რაც შეეხება მინისტრის მიერ რეზოლუციის კონტრარგუმენტად მოხმობას, ადვოკატი ამბობს, რომ ეს ორი სხვადასხვა საკითხია: „ევროპარლამენტის რეზოლუცია ამბობს, რომ მიხეილ სააკაშვილი არის პოლიტიკურად მსჯავრდებული პირი, - სამართლიანი სასამართლოს უფლებაზეა საუბარი, - ეს სარჩელი კი ეხებოდა სიცოცხლის უფლების შეზღუდვას“, - ამბობს ადვოკატი შოთა თუთბერიძე. მისი თქმით, გადაწყვეტილება სარჩელის გახმობის თაობაზე მიღებული იყო იმაზე დაყრდნობით, რომ ამ ეტაპზე მიხეილ სააკაშვილი თვლის, რომ მისი ჯანმრთელობის მდგომარეობა არ არის სიცოცხლისთვის სახიფათო; როგორც თავად აღნიშნა, არ მიაჩნია მიზანშეწონილად მასზე საზოგადოების ყურადღების კონცენტრირება. 25 აპრილს ევროპარლამენტმა მიიღო რეზოლუცია საქართველოში „უცხოეთის გავლენის გამჭვირვალობის კანონპროექტთან“ დაკავშირებით. რეზოლუცია, რომელსაც არასავალდებულო ხასიათი აქვს, ამბობს, რომ საქართველოსთან ევროკავშირში გაწევრების მოლაპარაკებები არ...