თბილისში, ხორავას ქუჩაზე 2017 წელს მოკლული დავით სარალიძის მამა, ზაზა სარალიძე ე.წ. აგენტების კანონის საწინააღმდეგო საპროტესტო აქციაზე მივიდა და განაცხადა, რომ შიმშილს იწყებს კანონპროექტის გაწვევის მოთხოვნით. როგორც მან ტელეკომპანია "ფორმულასთან" საუბარში განაცხადა, არასამთავრობო სექტორისა და თავისუფალი მედიის გარეშე, მისი შვილის მკვლელები თავისუფლები იქნებოდნენ. "მე ვიწყებ შიმშილს მანამ, სანამ ამ უაზრო კანონს არ გაიწვევენ უკან. აქ არაფერ შუაშია ენჯეო სექტორი და არც ტელევიზია, ეს ყველაფერი აისახება ჩვენზე, მოქალაქეებზე. რომ არ ყოფილიყვნენ არასამთავრობო ორგანიზაციები და თავისუფალი მედია, დღეს ჩემი შვილის მკვლელები გარეთ იქნებოდნენ. რაც ჩაფარცხეს, ყველაფერი იქნებოდა ჩახშული და დაბლოკილი, როგორც რუსეთში ხდება, მითუმეტეს, ამ კანონის მიღების შემდეგ... ეს კანონი არაფერ შუაშია გამჭვირვალობასთან. ეს კანონი არის პირდაპირ არასამთავრობო სექტორის და თავისუფალი მედიის, თავისუფალი სიტყვის დისკრედიტაციისკენ. დღეს მე ვეღარ გავჩერდი სახლში იმიტომ, რომ ჩემს ცოცხალ შვილს, რომელიც აქციებზე დადის, გამოდიან და მილანძღავენ. გამოდიან და ეძახიან ანგაჟირებულს, ვიღაცაზე მიყიდულს. არანაკლებს აკეთებდნენ ჩემს მიცვალებულ შვილზე. არავის მივცემ უფლებას, ჩემი ცოცხალი შვილის მომავალი გათელონ. დღეს საქართველო გადასარჩენია. არავის უნდა უღირდეს სახლში ჯდომა, ვისაც შვილები გიყვართ...", - განაცხადა ზაზა სარალიძემ. პარლამენტის წინ 19:00 საათიდნა იკრიბებიან მოქალაწეები ე.წ. აგენტების კანონის გასაპროტესტებლად. პარალელურად, პლენარულ სხდომაზე რამდენიმე საათია მეორე მოსმენით განიხილავენ კანონპროექტს. რუსთაველის გამზირზე მიმდინარე აქციას მსვლელობით შეუერთდნენ თსუ-ის და ილიაუნის სტუდენტები. ასევე ნახეთ პარლამენტის წინ მიმდინარეობს აქცია: „კი ევროპას! არა რუსულ კანონს!“  „აგენტების კანონი“, - ოფიციალურად, „უცხოეთის გავლენის გამჭვირვალობის კანონპროექტი“, - საქართველოს პარლამენტმა პლენარულ სესიაზე პირველი მოსმენით 17 აპრილს დაამტკიცა - 83 ხმით. 13 თვით ადრე, 2023 წლის მარტში, ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. კანონი ეხება საქართველოში არსებულ თითქმის ყველა არასამთავრობო ორგანიზაციას და არაერთ მედიასაშუალებას, მათ შორის - რადიო თავისუფლებასაც. კანონპროექტის პარლამენტში დაბრუნების შემდეგ თბილისში საპროტესტო დემონსტრაციები დაიწყო. ევროკავშირმა და ამერიკის შეერთებულმა შტატებმა საქართველოს ხელისუფლება არაერთხელ გააფრთხილეს, რომ კანონის მიღება უარყოფითად იმოქმედებს ევროკავშირისკენ საქართველოს სვლაზე. ...