სპეციალური დანიშნულების რაზმმა რუსთაველის გამზირი დატოვა. მათ დაშლა გამთენიის 4 საათის შემდეგ დაიწყეს - ჯერ უკუსვლით დაიხიეს, შემდეგ კი ჩიტაძის ქუჩისა და თავისუფლების მოედნის გავლით დატოვეს ტერიტორია. დაშლამდე რამდენიმე წუთით ადრე, მათ „აგენტების კანონის„ მოწინააღმდეგეების აქცია ცრემლსადენი გაზით დაარბიეს. ფიზიკურად გაუსწორდნენ აქციის მონაწილეებს. არიან დაკავებულებიც, შსს-ს მათი ზუსტი რიცხვის შესახებ ოფიციალური განცხადება არ გაუვრცელებია. პარლამენტთან რჩება აქციის მონაწილეების ნაწილი. მათ ჩიტაძის ქუჩაზე, პოლიციის კორდონის წინ, ბარიკადები ჯერ აღმართეს, შემდეგ კი მოხსნეს და ჩიტაძის ქუჩის მიმართულებით პარლამენტის უკანა შესასვლელისკენ გადაადგილდებიან. აქციის მონაწილეებმა ჩიტაძის ქუჩაზე ბარიკადები აღმართეს. აქციის მონაწილეებმა ჩიტაძის ქუჩაზე ბარიკადები აღმართეს. პარლამენტთან რჩებიან საპატრულო და კრიმინალური პოლიციის თანამშრომლები. პოლიციამ დემონსტრანტების დაშლა 30 აპრილის 21:00-ზე დაიწყო, იმ დროს, როდესაც ქართული ოცნების დეპუტატები საქართველოს პარლამენტის შენობას ტოვებდნენ. აქციის მონაწილეების დაშლისას ძალოვნებმა ჯერ ფიზიკური ძალა და სპეციალური საშუალება, სავარაუდოდ, წიწაკის სპრეი გამოიყენეს, მოგვიანებით კი - წყლის ჭავლი და ცრემლსადენი გაზი. აქციაზე დაშავდა არაერთი ადამიანი, მათ შორის სასტიკადაა ნაცემი პარტია „ნაციონალური მოძრაობის“ თავმჯდომარე, დეპუტატი ლევან ხაბეიშვილი. ნაცემია კიდევ ერთი პარლამენტარი - „მოქალაქეების“ ლიდერი ალეკო ელისაშვილი. რადიო თავისუფლებამ დააფიქსირა ორი შემთხვევა, როდესაც ერთი და იგივე ნიღბიანი პირი აქციის ორ სხვადასხვა მონაწილეს სახეში ძლიერად ურტყამს მუშტს. მესამე კვირაა, მოქალაქეები საქართველოს პარლამენტის წინ „აგენტების კანონის“ განხილვას აპროტესტებენ და მის გაწვევას მოითხოვენ. კანონპროექტი პირველი მოსმენით უკვე დაამტკიცეს და მიმდინარე კვირაში მეორე მოსმენისთვის დადგენილი წესით განიხილება. სესიაზე ეს პროცედურა ხვალ 12:00 სთ-დან გაგრძელდება. 13 თვით ადრე, 2023 წლის მარტში, ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. კანონი ეხება საქართველოში არსებულ თითქმის ყველა არასამთავრობო ორგანიზაციას და არაერთ მედიასაშუალებას, მათ შორის - რადიო თავისუფლებასაც. კანონპროექტის პარლამენტში დაბრუნების შემდეგ თბილისში საპროტესტო დემონსტრაციები დაიწყო. ევროკავშირმა და ამერიკის შეერთებულმა შტატებმა საქართველოს ხელისუფლება არაერთხელ გააფრთხილეს, რომ კანონის მიღება უარყოფითად იმოქმედებს ევროკავშირისკენ საქართველოს სვლაზე. ...