თბილისის საქალაქო სასამართლოს მოსამართლემ ლელა ცაგარეიშვილმა ჯარიმა, 2 000 შეუფარდა „რონდელის ფონდის“ უფროს მკვლევარს ალექსი პეტრიაშვილს, რომელიც 28 აპრილს პარლამენტის წინ გამართულ აქციაზე დააკავეს. ის მოსამართლემ 29 აპრილს გაათავისუფლა. ევროპულ და ევროატლანტიკურ სტრუქტურებში ინტეგრაციის საკითხებში ყოფილი სახელმწიფო მინისტრი მონაწილეობდა დემონსტრაციაში: „კი ევროპას! არა რუსულ კანონს!" შინაგან საქმეთა სამინისტრო ალექსი პეტრიაშვილს წვრილმან ხულიგნობასა და პოლიციის კანონიერი მოთხოვნისადმი დაუმორჩილებლობას ედავებოდა - რასაც ადმინისტრაციულ სამართალდარღვევათა კოდექსის 166-ე და 173-ე მუხლები ითვალისწინებს. მოსამართლემ მას ჯარიმა, სწორედ, დაუმორჩილებლობისთვის დააკისრა. როგორც პეტრიაშვილმა რადიო თავისუფლებას უთხრა, სასამართლო პროცესზე, რომელიც ექვს საათს გაგრძელდა, მოწმედ წარსდგა ორი პატრულ-ინსპექტორი. პეტრიაშვილის თქმით, „მოწმეები" მას შეურაცხყოფის მიყენებაში ადანაშაულებდნენ. „მონებო" და „იდიოტებო" გვეძახდაო“, - აღნიშნა მან. თუმცა, როგორც ყოფილმა სახელმწიფო მინისტრმა განაცხადა, არცერთ მათგანს უშუალოდ დაკავებაში მონაწილეობა არ მიუღია. „თქვეს, რომ კორდონში შევარდნისკენ მოვუწოდებდი: „მომაწექით, შევიდეთო", - თქვა მან და დაამატა, რომ მათი მონაყოლი ვიდეომტკიცებულებებმა გააბათილეს. როგორც ყოფილმა სახელმწიფო მინისტრმა შენიშნა, ერთ-ერთმა მოწმე პოლიციელმა დაადასტურა, რომ სამართალდარღვევის აქტს ადგენდა საპატრულო დეპარტამენტის შენობაში, სხვა პოლიციელის კარნახით, რომელიც ასევე არ იმყოფებოდა დაკავების ადგილას. 28 აპრილს რუსთაველზე, პარლამენტის წინ, „აგენტების კანონის“ წინააღმდეგ უწყვეტი პროტესტის ფარგლებში ხალხმრავალი აქცია გაიმართა - ღამის 12 საათისთვის, იმის მიუხედავად, რომ აქცია სრულიად მშვიდობიან ხასიათს ატარებდა, პარლამენტთან გამოჩნდა სპეცრაზმი. სახელმწიფომ დემონსტრანტების წინააღმდეგ გამოიყენა წიწაკის სპრეი. მობილიზებული იყო წყლის ჭავლის მანქანებიც. აქციის მსვლელობის პარალელურად, „საქართველოს ახალგაზრდა იურისტთა ასოციაცია“ შინაგან საქმეთა სამინისტროს მიმართავდა, რომ არ არსებობდა მშვიდობიანი აქციის დაშლის კანონისმიერი წინაპირობა. ...