კლინიკა ნიუ ჰოსპიტალსის ექიმი, ვაკო ლობჟანიძე ამბობს, რომ პარლამენტთან, "აგენტების კანონის" საწინააღმდეგო აქციაზე დაშავებული 25 წლის მოქალაქის თვალი გადარჩა და ოპერაციული ჩარევა, ამ ეტაპზე, არ სჭირდება. ექიმი ამბობს, რომ დაზიანება საშუალო სიმძიმისაა და საჭიროა, ჭრილობის გაკერვა თვალ-ბუდის არეში. "სერიოზული ტრავმაა მარჯვენა თვალის, თუმცა გადაღებულია ტომოგრაფია და თვალი გადარჩა. ამ ეტაპზე, არ ჩანს ისეთი დაზიანება, რომ ოპერაცია დასჭირდეს თვალზე. დამატებითი კვლევა და დაკვირვება მიმდინარეობს. ყბა-სახის ქირურგი ჭრილობას დაუმუშავებს და გაკერავს წარბის არეს, ანუ თვალბუდის და წარბის ტრავმაა თანმხლები, თვალის კონტუზია, ანუ რბილი ქსოვილების ტრავმაა", - განმარტავს ექიმი. მისივე სიტყვებით, დაზიანება, სავარაუდოდ, ბლაგვი საგნით არის მიყენებული. ჟურნალისტებთან საუბრისას იგი იხსენებს, რომ "ბლაგვი საგნის ჩარტყმა" თავად პაციენტმა ახსენა. "სავარაუდოდ, ბლაგვი საგნით არის მიყენებული, ზუსტად არ ვიცით მექანიზმი. მე როგორც ვიცი, ამბობდა, რაღაც საგანი ჩამარტყესო, მე არ გამომიკითხავს, უბრალოდ შევესწარი ამ ფაქტს, შეიძლება რაღაც ნასროლიც იყოს. [დაზიანება] არ ჰგავს [რეზინის ტყვიის ნასროლს], უფრო შეიძლება, იყოს ბლაგვი საგნით მიყენებული", - თქვა მან. მისივე ცნობით, ნიუ ჰოსპიტალში აქციის კიდევ ერთი მონაწილე მიიყვანეს, "შედარებით მსუბუქ" მდგომარეობაში, რომელსაც "წიწაკის სპრეით" ჰქონდა "მსუბუქი ხარისხის" კანის გაღიზიანება. ასევე ნახეთ აქციის ერთ მონაწილეს თვალი აქვს დაზიანებული რუსთაველისა და 9 აპრილის ქუჩის კუთხის მხარეს პარლამენტის ეზოში მყოფმა პოლიციამ აქციის მონაწილეების მიმართ წლის ჭავლის, ცეცხლმაქრი ქაფისა და "წიწაკის სპრეის" გამოყენება მას შემდეგ დაიწყო, რაც აქციის რამდენიმე მონაწილემ პარლამენტის შენობის რკინის ჭიშკრების რყევა დაიწყო - 22:30-სთვის სამართალდამცველებს უკვე გამოყენებული ჰქონდა ყველა საპოლიციო სპეციალური საშუალება: წიწაკის სპრეი, ცრემლსადენი გაზი, წყლის ჭავლი. ...