შეერთებული შტატების სახელმწიფო დეპარტამენტის პრესსპიკერი მეთიუ მილერი აცხადებს, რომ კომენტარები, რომლებიც არასწორად ახასიათებს საქართველოსთვის აშშ-ისგან მიღებულ დახმარებას, ძირს უთხრის ორი ქვეყნის ურთიერთობებს. პირველი მაისით დათარიღებული განცხადებით მეთიუ მილერი გმობს „უცხოეთის აგენტების“ კანონს, ასევე გმობს ძალადობას მშვიდობიანი საპროტესტო აქციებისა და ჟურნალისტების მიმართ და აცხადებს, რომ „ქართული ოცნების“ ანტიდასავლურმა რიტორიკამ საქართველო არასტაბილურ გზაზე დააყენა. „კომენტარები, რომლებიც არასწორად ახასიათებს საქართველოში უცხოეთიდან მიღებულ დახმარებას - რასაც ჩვენ 32 წლის განმავლობაში გავცემდით საქართველოს ეკონომიკის, დემოკრატიისა და რუსეთის აგრესიის შეკავებისათვის შესაძლებლობების გასაძლიერებლად - ფუნდამენტურად უთხრის ძირს იმ ძლიერ ურთიერთობას, რომელიც ჩვენ საქართველოს მთავრობასთან და ხალხთან გვაქვს“, - წერია განცხადებაში. განცხადების თანახმად, შეერთებული შტატები კიდევ ერთხელ „გმობს კრემლისგან შთაგონებულ „უცხოეთის გავლენის“ კანონს, რომელმაც დღეს საქართველოს პარლამენტში წინ წაიწია, და ცრუ ნარატივს, რომელსაც მთავრობის წარმომადგენლები მის გასამართლებლად ავრცელებენ“. სახელმწიფო დეპარტამენტის შეფასებით, კანონმა და „ქართული ოცნების“ ანტიდასავლურმა რიტორიკამ საქართველო არასტაბილურ გზაზე დააყენა. „საქართველოს ხელისუფლების განცხადებები და ქმედებები შეუთავსებელია იმ დემოკრატიულ ღირებულებებთან, რომლებიც საფუძვლად უდევს ევროკავშირისა და ნატოში წევრობას, და, ამრიგად, საფრთხეს უქმნის საქართველოს გზას ევროატლანტიკური ინტეგრაციისკენ“, - წერია განცხადებაში. განცხადებაში ასევე დაგმობილია „ძალადობა მშვიდობიანი საპროტესტო აქციების მიმართ, მათ შორის ჟურნალისტების მიმართ, რომლებიც დემონსტრაციებს აშუქებენ“. ასევე ნახეთ ვგმობთ ძალადობას მშვიდობიანი საპროტესტო აქციების მიმართ - აშშ-ის სახელმწიფო დეპარტამენტი „აგენტების კანონი“, - ოფიციალურად, „უცხოეთის გავლენის გამჭვირვალობის კანონპროექტი“, - საქართველოს პარლამენტმა პლენარულ სესიაზე პირველი მოსმენით 17 აპრილს დაამტკიცა - 83 ხმით. მეორე მოსმენით კანონპროექტი პირველ მაისს მიიღეს. დარჩა მესამე, საბოლოო მოსმენა. 13 თვით ადრე, 2023 წლის მარტში, ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა. კანონი ეხება საქართველოში არსებულ თითქმის ყველა არასამთავრობო ორგანიზაციას და არაერთ მედიასაშუალებას, მათ შორის რადიო თავისუფლებასაც. კანონპროექტის პარლამენტში დაბრუნების შემდეგ თბილისში საპროტესტო დემონსტრაციები დაიწყო. პოლიციამ არაერთხელ გამოიყენა ცრემლსადენი გაზი, წყლის ჭავლი და „წიწაკის სპრეი“...