პარლამენტის ვიცე-სპიკერი არჩილ თალაკვაძე გამოეხმაურა ოპოზიციის დეპუტატების განცხადებას, რომელიც ეხებოდა 2 მაისს პარლამენტში დანიშნული სხდომების გაუქმებას. როგორც თალაკვაძემ თქვა, სხდომები სააღდგომო დღესასწაულების შემდეგ განახლდება. „უსაფრთხოების მაღალი დონის გამოცხადება გამოიწვია პარლამენტზე ძალადობრივმა შეტევამ და ეს არის ერთ-ერთი აშკარა მტკიცებულება და არგუმენტი იმისა, რომ გუშინ [1 მაისს] ნამდვილად იყო მცდელობა, რომ აქციები ძალადობრივ სცენარში გადაზრდილიყო. რაც შეეხება პოლიტიკურ უმცირესობას და რადიკალურ ოპოზიციას, კარგია, რომ ნაძალადევი ხუმრობის ხასიათზე არიან. ეს, რა თქმა უნდა, არის იაფფასიანი სპეკულაცია. სხდომები განახლდება, როდესაც დღესასწაულები ჩაივლის და მერე ვნახავთ, ვის ვისი ეშინია“, - თქვა თალაკვაძემ. პარლამენტის ინფორმაციით, დღეს, 2 მაისს, პარლამენტში დაგეგმილი ღონისძიებები (ბიუროს და პლენარული სხდომები) არ გაიმართება. ასევე ნახეთ დღეს, 2 მაისს, პარლამენტში დაგეგმილი სხდომები არ გაიმართება ოპოზიციის წარმომადგენლებმა პარლამენტის უკანა შესასვლელთან გამართულ ერთობლივ ბრიფინგზე თქვეს, რომ „აგენტების კანონის“ საწინააღმდეგო აქცია დღეს, 2 მაისს, 19:00 საათზე დაიწყება. ისინი გამოეხმაურნენ პარლამენტში დანიშნული სხდომების გაუქმების გადაწყვეტილებას. „საქართველოს მარიონეტულმა ხელისუფლებამ პარლამენტს დაადო ბოქლომი, გადამალეს საგარეო საქმეთა მინისტრი და შეშინებულებმა, ფაქტობრივად, გააუქმეს საკანონმდებლო ორგანოს მუშაობა. მანამდე, ათდღიანი არნახული არდადეგები მოუწყვეს მთელ ქვეყანას“, - თქვა რომან გოცირიძემ, საპარლამენტო პოლიტიკური ჯგუფის, „ევროოპტიმისტების“ თავმჯდომარემ. ასევე ნახეთ 2 მაისს, 19:00 საათზე, პარლამენტთან „აგენტების კანონის“ საწინააღმდეგო აქცია დაინიშნა 1 მაისს „აგენტების კანონის“ მეორე მოსმენით განხილვასა და მიღებას, უმაღლესი წარმომადგენლობითი ორგანოს შენობის გარშემო მოქალაქეთა მრავალათასიანი პროტესტი მოჰყვა. პარლამენტის შენობის გვერდით, ჩიტაძის ქუჩაზე, სპეცრაზმი რამდენიმე საათის განმავლობაში იყენებდა წყლის ჭავლსა და ცრემლსადენ გაზს. პოლიცია ასევე პარლამენტის ეზოდან ქუჩის მიმართულებით იყენებდა სპეციალურ საშუალებებს, რის შემდეგაც აქციის მონაწილეებმა ბარიკადები ააგეს ხის და რკინის ჯებირებით, ასევე - ნაგვის ურნებით და ჩახერგეს პარლამენტის ერთ-ერთი შესასვლელი ჩიტაძის ქუჩიდან. მოგვიანებით აქციის მონაწილეებმა გადაინაცვლეს ჭიჭინაძის ქუჩაზე, სადაც ასევე სცადეს ჩაეხერგათ შენობის ჭიშკარი. სპეცრაზმმა მათ წინააღმდეგ ისევ გამოიყენა წყლის ჭავლი, რა დროსაც აქციის მონაწილეებმა რუსთაველის გამზირისკენ გადაინაცვლეს. ამის შემდეგ ჩიტაძისა და ჭიჭინაძის ქუჩები მთლიანად საპატრულო და კრიმინალური პოლიციის წარმომადგენლებმა დაიკავე...