აშშ-ის სამხედროებმა 3 მაისს განაცხადეს, რომ ამინდის პირობების გამო, დროებით აჩერებენ საზღვაო პირსის მშენებლობას და ამის ნაცვლად, მის მშენებლობას გააგრძელებენ ისრაელის ნავსადგურ აშდოდში. საზღვაო პირსი - ნავმისადგომი, როცა აშენდება, განთავსდება ღაზის სანაპიროსთან, რათა დააჩქაროს ჰუმანიტარული დახმარების მიწოდება პალესტინელთა ტერიტორიაზე. "ძლიერმა ქარმა და ზღვის ღელვამ, რაც მოსალოდნელი იყო, სახიფათო პირობები შეუქმნა ნაწილობრივ აშენებული პირსის ზედაპირზე მომუშავე სამხედროებს", - ნათქვამია აშშ-ის სამხედროების განცხადებაში. "ნაწილობრივ აშენებული პირსი და მის მშენებლობაში მონაწილე სამხედრო ხომალდები გადავიდა აშდოდის ნავსადგურში…" - ასევე აღნიშნულია განცხადებაში. ამ კვირის დასაწყისში პენტაგონმა განაცხადა, რომ პირსის დაახლოებით ნახევარი მზად იყო. ისრაელმა სამხედრო ოპერაცია ღაზის სექტორში 7 ოქტომბერს დაიწყო, რასაც, ადგილობრივი ჯანდაცვის ორგანოების თანახმად, 34 000-ზე მეტი პალესტინელის დაღუპვა მოჰყვა და ანკლავი გავერანებულ ტერიტორიად აქცია. ომი მას მერე დაიწყო, როცა ჰამასის (აშშ-სა და ევროკავშირში ტერორისტულად შერაცხილი დაჯგუფება) მებრძოლები თავს დაესხნენ ისრაელს 7 ოქტომბერს და, ისრაელის მონაცემებით, 1200 ადამიანი დახოცეს და 250 - გაიტაცეს. ისრაელი ცდილობდა იმის დემონსტრირებას, რომ ის არ აფერხებს ღაზისთვის დახმარების მიწოდებას, განსაკუთრებით მას შემდეგ, რაც პრეზიდენტმა ჯო ბაიდენმა მკვეთრად გააფრთხილა პრემიერ-მინისტრი ბენიამინ ნეთანიაჰუ და განაცხადა, რომ ვაშინგტონის პოლიტიკა შეიძლება შეიცვალოს, თუ ისრაელი არ მიიღებს ზომებს მშვიდობიანი მოსახლეობისადმი მიყენებული ზიანის, ჰუმანიტარულია კრიზისის და ჰუმანიტარული ორგანიზაციების თანამშრომელთა უსაფრთხოების მოსაგვარებლად. აშშ-ის ოფიციალური პირები და ჰუმანიტარული დახმარების ჯგუფები აცხადებენ, რომ გარკვეული წინსვლა მიღწეულია, მაგრამ გაფრთხილებას გამოთქვამენ, რომ ეს არასაკმარისია ღაზის 2,3 მილიონი მცხოვრების მოსალოდნელი შიმშილის შესახებ მკაცრი გაფრთხილებების ფონზე. ასევე ნახეთ ისრაელის სამხედროები: სურსათით დატვირთული ავტომანქანები პირველად შევიდნენ ღაზაში აშდოდის ნავსადგურიდან ...