ქალაქ გორში, სამეფოს ქუჩაზე, ყოფილ კულტურის სახლში ხანძარი გვიან ღამით გაჩნდა და შენობა თითქმის მთლიანად დაიწვა. სახანძრო სამსახურის თანამშრომლები ხანძარს მთელი ღამის განმავლობაში ებრძოდნენ. დამატებითი ბრიგადების გამოძახებაა თბილისიდანაც გახდა საჭირო. ხანძრის შედეგად არავინ დაშავებულა. ჯერჯერობით დაუდგენელია ხანძრის გამომწვევი მიზეზები. სამეფოს ქუჩაზე ელექტროენერგიის და ბუნებრივი აირის მიწოდება შეწყვეტილია. როგორც რადიო თავისუფლების კორესპონდენტი იტყობინება, სახანძრო-სამაშველო სამსახურის თანამშრომლები ამ დრომდე კვლავ შემთხვევის ადგილზე იმყოფებიან და ხანძრის მცირე კერებს აქრობენ. ბოლო წლებში, კულტურის სახლის ავარიული შენობა უფუნქციოდ იყო დარჩენილი. მის აღდგენას მეზობლად მცხოვრები მოქალაქეები ითხოვდნენ, თუმცა უშედეგოდ. კულტურის სახლის ყოფილ შენობაში ხანძარი გასული წლის ივლისშიც გაჩნდა, თუმცა პატარა კერის ლიკვიდაცია სახანძრო სამსახურმა სწრაფად შეძლო. უძველეს შენობას კულტურული მემკვიდრეობის სტატუსი ჰქონდა მინიჭებული. მე-19 საუკუნეში იქ ვაჟთა გიმნაზია იყო განთავსებული, სადაც სწავლობდნენ სოფრომ მგალობლიშვილი, ერეკლე ტატიშვილი და სხვები. შენობა გადაურჩა 1920 წლის დამანგრეველ მიწისძვრას. ...