"აგენტების კანონის" წინააღმდეგ საპროტესტო აქცია-მსვლელობა გაიმართა თელავში, მეფე ერეკლე II-ის ძეგლის მიმდებარე ტერიტორიაზე. აქციის მონაწილეები მთელი კახეთიდან შეიკრიბნენ, მათ შორის იყვნენ თელავის სახელმწიფო უნივერსიტეტის სტუდენტები, ლექტორები, სკოლის მოსწავლეები, არასამთავრობო ორგანიზაციების წარმომადგენლები, ფერმერები და სხვადასხვა პროფესიის ადამიანები. აქციის მონაწილე ფერმერმა გურჯაანიდან, მევლუდ გოგიაშვილმა, რადიო თავისუფლებას უთხრა, რომ "აგენტების კანონი" საქართველოს ევროპულ მომავალს უკარგავს და ის ყველა იმ აქციაში მიიღებს მონაწილეობას, რომლებიც კახეთში გაიმართება. "არა რუსულ კანონს!" - საპროტესტო აქცია თელავში. 7 მაისი, 2024 წელი "არა რუსულ კანონს!" - საპროტესტო აქცია თელავში. 7 მაისი, 2024 წელი საპროტესტო აქციის მონაწილეებს მიმართა სამოქალაქო აქტივისტმა არჩილ მჭედლიშვილმა. "კანონი, რომელიც საზოგადოებას ხლეჩს, არ უნდა მიიღო. ეს კანონო ოცნებას საშუალებას აძლევს, აკონტროლოს ის ხალხი, ვინც მათი მმართველობის ფორმებს არ ეთანხმება. კანონს თუ არ გაიწვევენ, მივიღებთ რუსულ მთავრობას", - თქვა მან. მეფე ერეკლე მეორის ძეგლის მიმდებარე ტერიტორიიდან აქცია მსვლელობით გაგრძელდა. მონაწილეები თელავის მერიასთან მივიდნენ. შენობიდან პარტია "ნაციონალური მოძრაობის" წევრებმა საქართველოსა და ევროკავშირის დროშები გადმოკიდეს. მსვლელობა დასრულდა საქართველოს ერთიანობისთვის დაღუპულთა მემორიალთან, სადაც აქციის მონაწილეებმა სანთლები დაანთეს. ბოლოს მსვლელობის მცირეწლოვანმა მონაწილეებმა ქართული ცეკვები შეასრულეს. ...