7 მაისს "აგენტების კანონის" საწინააღმდეგო მორიგი აქცია გაიმართა თბილისში. მომიტინგეებმა მსვლელობა მოაწყვეს პარლამენტიდან "ქართული ოცნების" ოფისის მიმართულებით, სადაც პოლიციის კორდონი დახვდათ. ადგილზე მისვლისას აქციის ერთ-ერთმა ორგანიზატორმა ზვიად ცეცხლაძემ პოლიციელებს მიმართა და მოუწოდა, მკაფიოები იყვნენ თავიანთ პოზიციაში. მან ასევე თქვა, რომ შექმნეს ჯგუფი, რომელიც იმაზე იმუშავებს, რომ საჯარო სამსახურებიდან გათავისუფლებულ ადამიანებს ფინანსურად დაეხმაროს. "ვიცი, ძალიან ბევრს არ გსურთ მანდ დგომა. დარწმუნებული ვარ, ბევრი თქვენგანი 2008 წლის ვეტერანია, ბევრი თქვენგან გულანთებული პატრიოტია, გიყვართ თქვენი შვილები, რადგან ეს თაობა თქვენი შვილების თაობაა... გთხოვთ, იყავით რაც შეიძლება მკაფიო თქვენს პოზიციაში, საქართველოს მომავალს თქვენ გარეშე ვერ დავიცავთ... ჩვენ გამოვედით ინიციატივით, შევქმენით ჯგუფი და ვმუშაობთ იმისთვის, რომ საჯარო სამსახურში დასაქმებულ ადამიანებს დავეხმაროთ ფინანსურად, რათა არ იყვნენ მიჯაჭვული სახელმწიფოზე. არ არის აუცილებელი, რომ ოჯახებში ლუკმა-პურის შესატანად თქვენი ნების საწინააღმდეგოდ იმოქმედოთ. გვაქვს კავშირი სხვადასხვა კომპანიასთან და გათავისუფლების შემთხვევაში, თქვენ შესაბამის ანაზღაურებას გადაგიხდიან, ზოგიერთი თქვენგანი კომპანიებშიც დასაქმდება. გთხოვთ, ამაზე იფიქროთ", - მიმართა მან პოლიციელებს. ცეცხლაძემ ასევე მოუწოდა ყველა პოლიტიკურ პარტიას, გაერთიანდნენ და დათმონ კონკრეტული პოლიტიკური ინტერესები. მსვლელობის დროს, აქციის მონაწილეების ნაწილი მშვიდობის ხიდზე ავიდა, საიდანაც ევროკავშირისა და საქართველოს დროშები გადმოფინეს, შემდეგ კი ისევ რუსთაველის გამზირზე, პარლამენტისკენ წავიდნენ. 1 მაისს საქართველოს პარლამენტმა „აგენტების კანონი“ მეორე მოსმენით მიიღო. „უცხოური გავლენის გამჭვირვალობის“ კანონის ძალაში შესვლის შემთხვევაში, მედიასაშუალებებსა და არასამთავრობო ორგანიზაციებს, რომლებიც დაფინანსების 20%-ზე მეტს უცხოელი დონორებისგან იღებენ, დაავალდებულებენ, დარეგისტრირდნენ, როგორც „უცხოური ძალის ინტერესების გამტარებელი ორგანიზაცია“. "აგენტების კანონის“ წინააღმდეგ საპროტესტო აქციები სახელწოდებით „კი ევროპას! არა რუსულ კანონს“ თბილისში უწყვეტად მიმდინარეობს. ...