რუსეთის პრეზიდენტმა ვლადიმირ პუტინმა 8 მაისს უარი თქვა კომენტარზე უკრაინის დაზვერვის წარმომადგენელთა მიერ გუშინ გაკეთებულ განცხადებაზე, რომ აღკვეთილ იქნა უკრაინის პრეზიდენტ ვოლოდიმირ ზელენსკიზე თავდასხმა, რომლის უკან ფსბ იდგა. Reuters-ს მოჰყავს კრემლის პრესსპიკერის, დმიტრი პესკოვის სიტყვები იმის შესახებ, რომ უკრაინის ბრალდება არ შეესაბამება სიმართლეს. ასევე ნახეთ უკრაინამ განაცხადა, რომ აღკვეთილია ზელენსკის, ბუდანოვის და სხვა მაღალჩინოსნების მკვლელობა უკრაინის უსაფრთხოების სამსახურმა 7 მაისს გამოაცხადა, რომ ჩაშალა რუსეთის უშიშროების ფედერალური სამსახურის გეგმა, რომელიც მიზნად ისახავდა უკრაინის პრეზიდენტ ვოლოდიმირ ზელენსკის და უმაღლესი სამხედრო-პოლიტიკური ხელმძღვანელობის სხვა წარმომადგენლების ლიკვიდაციას. მათ შორის დასახელებული არიან უკრაინის უსაფრთხოების სამსახურის და თავდაცვის სამინისტროს დაზვერვის მთავარი სამმართველოს ხელმძღვანელები ვასილ მალიუკი და კირილო ბუდანოვი. უკრაინის უსაფრთხოების სამსახურის მიერ გამოქვეყნებული ინფორმაციით, რუსეთის უშიშროების ფედერალური სამსახურის გეგმა უნდა განეხორციელებინა აგენტების ქსელს, რომელშიც ჩართული იყო უკრაინის სახელმწიფო დაცვის სამმართველოს ორი პოლკოვნიკი. უსაფრთხოების სამსახურის თანახმად, ისინი რუსეთს აწვდიდნენ საიდუმლო ინფორმაციას. ორივე მათგანი დაკავებულია და დანაშაულის დამტკიცების შემთხვევაში სამუდამო პატიმრობა ემუქრებათ. უკრაინის უსაფრთხოების სამსახურის მტკიცებით, რუსეთის აგენტების ქსელის ერთ-ერთი ამოცანა იყო მოძიება პრეზიდენტის დაცვასთან დაახლოებული სამხედროებისა, რომლებიც შეძლებდნენ ვოლოდიმირ ზელენსკის მძევლად აყვანას და შემდეგ ლიკვიდაციას. რუსეთის ფართომასშტაბიანი შეჭრის შემდეგ, 2022 წლის 24 თებერვლიდან უკრაინის სპეცსამსახურებმა არაერთხელ განაცხადეს, რომ აღკვეთეს პრეზიდენტ ვოლოდიმირ ზელენსკიზე თავდასხმის და ლიკვიდაციის გეგმა. ...